ಮರಣೋನ್ಮುಖ ಪ್ರಸಂಗ

ಜಸ್ಸಿಂ ಫೋರ ವ್ಹೀಲ್ಸ ವ್ಹೆಹಿಕಲಾಕ ರಿವರ್ಸ ಗೀಯರ್ ಉರ್ತಾ ತಸ್ಸಿಂ ಆಮ್ಗೆಲ ವಿಚಾರಾಂಕ ಭಿ ರಿವರ್ಸ ಗೀಯರ್ ಉರ್ತಾ. ರಿವರ್ಸ್ ಗಿಯರಾಂತು ವಿಚಾರ ಕರ್ತನಾ ಭೂತಕಾಲಾಂತು ಘಡಿಲ ಘಟನೇಂಚೆ ಉಗಡಾಸ ಜಾತ್ತಾ.

ಇ.ಸ 1992 ತು ಕಂಪನಿ ಕಾಮಾ ಖಾತ್ತಿರಿ ಹಾಂವು ಲಂಡನ್ನ್ ಗೆಲಿಲೊಂ. ಪರತ ಮುಂಬಯಿ ಯೆತ್ತನಾ ಕೆಲಿಲ ವಿಮಾನ ಪ್ರವಾಸ ಮರೇ ಪರ್ಯಂತ ಹಾಂವು ವಿಸರನಾ. ಕಾರಣ ಮರಣಾಚೆ ಭಯ ಮ್ಹಳ್ಯಾರಿ ಕಸ್ಸಿಂ ಉರ್ತಾ ತೆಂ ತ್ಯಾ ಪ್ರವಾಸಾಂತು ಮೆಗೆಲ ಅನುಭವಾಂತು ಆಯ್ಲೆಂ.

ಸಕ್ಕಾಳಚೆ 9:45 a.m , Air-India ಚೆ ಜಂಬೊ ಜೆಟ್ 747 ವಿಮಾನಾನ ಲಂಡನ್ನ್ ಚೆ ಹೀಥ್ರೋ ಏರಪೋರ್ಟಾವೈಯ್ಲ್ಯಾಂನ ಟೇಕ-ಓಫ್ ಕೆಲ್ಲೆಂ. ತೆ ವಾಯಾ ದಿಲ್ಲಿ , ಮುಂಬಯಿ ಯೆವ್ಚೆಂ ಆಸ್ಸಿಲೆಂ. ದಿಲ್ಲಿ ಪರ್ಯಂತ ಅಗ್ದಿ ಆರಾಮಾಂತು ಆಯ್ಲೆಂ. ವಿಮಾನಾಂತುಲ ಅರ್ಧಾ ಪುಸಿ ಜಾಸ್ತಿ ಪ್ರವಾಸಿ ದಿಲ್ಲಿಂತು ದೆಂವ್ಲೆ. ಕ್ರೂ ಮೆಂಬರ್ಸ ದಿಲ್ಲಿಂತು ಬದಲಲೆ. ರಾತ್ರಿ 1:30 a.m ವಿಮಾನಾನ ದಿಲ್ಲಿಸಾವ್ನು ಟೇಕ್-ಓಫ್ ಕೆಲ್ಲೆಂ. ದಿಲ್ಲಿ ಮುಂಬಯಿ ಫ್ಲಾಯಿಂಗ್ ಟಾಯ್ಮ್ ಫಕ್ತ ದೇಡ ತಾಸ.

ರಾತ್ರಿ ವೇಳ. ಕೆಬಿನ್ನಾಂತು ಲಾಯ್ಟ ಡಿಮ್ಮ್ ಕೆಲಿಲೆ. ಬಹುತೇಕ ಪೆಸೆಂಜರ್ಸ ಬಸಿಲ ಕಡೆನ ನಿದಲಿಲೆ. ಮಾಕ್ಕಾ ಪ್ರವಾಸಾಂತು ನೀದಯೆನಾ. ಖಿಡಕಿ ಲಾಗೂನ ಸೀಟ ಮೆಳಿಲೆಂ. ವಿಮಾನ ತೀಸೇಕ ಹಜಾರ ಫೀಟ ವೈಯ್ಲ್ಯಾಂನ ಉಡತಸ್ಸಿಂಲೆ. ಖಿಡಕಿಂತುಲ್ಯಾಂನ ಚಂದ್ರ ದಿಸನಾ ಜಾಲೆತಿಕೀ ನಕ್ಷತ್ರಂ ಪೊಳೊಚ್ಯಾಕ ಮಜಾ ಯೆತ್ತಸಿಲಿ. ಪ್ರತ್ಯೇಕ ಸೀಟಾಕ ಎಟೇಚ್ ಆಸ್ಸಿಲ ಮ್ಯೂಸಿಕ್ ಸಿಸ್ಟಮಾಂತುಲ್ಯಾನ ಇಂಡಿಯನ್ನ್ ಲಾಯ್ಟ ಕ್ಲಾಸಿಕಲ್ ಫಿಲ್ಮ ಸೋಂಗ, ಕಾನ್ನಾಂಕ ಇಯರ ಫೋನ ಲಾವ್ನು ಹಾಂವು ಆಯ್ಕತ ಆಸ್ಸಿಂಲೊ. ಬಹುತೇಕ ಸೋಂಗ್ಸ್ ಪಾವ್ಸಾಚೇರಿ ಆಸಿಲಿಂತಿ. ರಾಗ ಮೇಘ ಮ್ಹಲಾರ , ಮಿಯಾಂ ಮ್ಹಲಾರ... ಇತ್ಯಾದಿ.

ಮದೆಂಚಿ," ಸೀಟ ಬೆಲ್ಟ್ ಲಾವ್ನು ಘೇಯಾ" ಮ್ಹೋಣು ಏನೌನ್ಸಮೆಂಟ್ ಜಾಲ್ಲೆಂ. ಪ್ರತ್ಯೇಕ ಪಬ್ಲಿಕ ಸರ್ವಿಸ್ ಯುನಿಟಾಂತು , "Fasten your seat belt" ಸಿಗ್ನಲ್ ಭಿ ಆಯ್ಲೆಂ. ಹಾಂವೆ ಲೆಕಲೆಂ , ಆತ್ತಂ ಧಾ-ಪಂದ್ರ ಮಿನಿಟಾ ಭಿತ್ತರಿ ಆಮ್ಮಿ ಮುಂಬಯಿ,ಸಹಾರಾ ಇಂಟರ ನೇಶನಲ್ ಏರ್ ಪೋರ್ಟಾರಿ ದೆಂವತಾತಿ.

ಮೆಗೆಲ ಅಂದಾಜೊ ಬರೋಬರ ಆಸ್ಸಿಲೊ. ವಿಮಾನ ಹಜಾರೇಕ ಫೀಟ ಫೊಂಡಾಂತು ಪಡಿಲ್ಯಾವರಿ ಏಕದಮ್ ಸಕ್ಕಲ ಆಯ್ಲೆಂ. ಪರತ ವೈರ್ಯಿ ಗೆಲ್ಲೆಂ. ಅಸ್ಸಿಂ ದೋನಚಾರ ಪಂತಾ ಜಾಲ್ಲೆಂ. ದಾವ್ಯಾನ ಉಜವ್ಯಾನ ವಿಮಾನ ಸ್ವಿಂಗ್ ಜಾತ್ತಸಿಲೆಂ. ಖಿಡಕಿಂತುಲ್ಯಾನ ಭಾರ್ಯಿ ಪಳೈಲ್ಯಾರಿ ವಿಮಾನಾಚೆ ವಿಂಗ ಟಿಪ್ ಆಠ-ಧಾ ಫೀಟ ವೈರ್ಯಿ ಸಕ್ಕಲ ಜಾತ್ತಸಿಲೆ. ಪೂರಾ ಪ್ರವಾಸಿ ಜೀವ ಗಳ್ಯಾಂತು ಧೋರ್ನು ಬಸಿಲೆ.

ತಿತ್ಲ ಭಿತ್ತರಿ ಆನ್ನೇಕ ಏನೌನ್ಸಮೆಂಟ್ ಜಾಲ್ಲೆಂ. ಏರ ಹೋಸ್ಟೆಸ್ ಸಾಂಗ್ತಸಿಲಿ, " ಆಮ್ಮಿ ಥೊಡೆ ವೇಳಾನ ಮುಂಬಯಿ ಸಹಾರ ಇಂಟರ ನೇಶನಲ್ ಏರ ಪೋರ್ಟಾರಿ ದೆಂವತಾತಿ. ಭಾರ್ಯಿ ಪಾವ್ಸು ಪಡತ ಆಸ್ಸಾ. ರಾತ್ರಿಚೆ 3:20 a.m ಜಾಲ್ಲೆತಿ. ಭಾಯ್ಲ ತಾಪಮಾನ ಬಾವೀಸ ಡಿಗ್ರಿ ಸೆಲ್ಸಿಯಸ್." ಇತ್ಯಾದಿ.

ಹಾಂವೆ ಅನೇಕ ಪಂತಾ ವಿಮಾನ ಪ್ರವಾಸ ಕೆಲ್ಲಾ. ಪಣ ಅಸ್ಸಲ ಅನುಭವ ನವೀನ. ಮೆಗೆಲ ಮನಾಂತು ಬಸಿಲಕಡೆನ ವಾಯ್ಟ ವಿಚಾರ ಯೆವಚ್ಯಾ ಲಾಗಲೆ. ಮೇಘ ಮ್ಹಲಾರ ಮ್ಹಣತ ತಾನಸೇನ ಪಾವ್ಸು ಪಾಡೈತಸಿಲೊ. ಹಾಂಗಾ ಮೇಘ ಮ್ಹಲಾರ ಆಯ್ಕತನಾ ವಿಮಾನ ಸಕ್ಕಲ ಪಣಾ ಜಾಲ್ಯಾರಿ ಪುರೊ.

ವಾಂಚೂನು ಊರ್ಕಾ ಮ್ಹಳಿಲ ಆಶಾ ತೀರ್ವ ಆಸ್ತನಾ, ದುರ್ಮರಣಾಚೆ ಭಯ ಭಯಾನಕ ಜಾವ್ನು ದಿಸ್ತಾ. ಪಾಯಲೆಟಾನ ವಿಮಾನ ಲೆಂಡ ಕೊರ್ಚೆ ಪ್ರಯತ್ನ ಕೆಲ್ಲೆ. ಪರತ ಟೇಕ ಓಫ್ ಕೆಲ್ಲೆಂ. ಹಾಂವ ಖಿಡಕಿಂತುಲ್ಯಾನ ಭಾರ್ಯಿ ಪಳೈತ ಬಸಿಲೊಂ. ವಿಮಾನ ಹಜಾರೇಕ ಫೀಟ ವೈರ್ಯಿ ಗೆಲ್ಲೆತಿಕಿ ಮೊಡಾನ ಭಾಯ್ಲೆಂ ಕಸ್ಸನೆ ದಿಸ್ನಾಸಿಲೆಂ. ಫಕ್ತ ವೀಜ ಚಮಕ್ತನಾ ದಿಸ್ತಸಿಲೆಂ.

ಜೂನ್ ಅಠ್ರ ತಾರೀಖ. ಪಾವ್ಸಾನ ಸುರುವಾತಿಕ ಝೋರ್ ಧರಿಲೊ. ಅಸ್ಸಲೆ ಅನಾನುಕೂಲ ಪರಿಸ್ಥಿತಿಂತು ಪಾಯಲೆಟ ಪರತ ಲೆಂಡ ಕೊರ್ಚೆ ಪ್ರಯತ್ನ ಕರ್ತಸಿಲೊ. ಶಾಬೂತ ಘರ ಪಾವತಾಂ ಮ್ಹಳಿಲ ಮೆಗೆಲ ವಿಶ್ವಾಸ ಉಡೂನು ಗೆಲಿಲೊ. ಆಸ್ತಿಕ ಭಾವನಾ ಜಾಗ್ರತ ಜಾಲ್ಲಿ. ಕಾನ್ನಾಂತುಲ ಇಯರ ಫೋನ ಕಾಣದವರ್ಲೊ. ದೋನ್ನಿ ದೋಳೆ ಧಾಂಪೂನು ಹಾಂವೆ ಕುಲದೇವಾಲಿ, ಇಷ್ಟ ದೇವಾಲಿ, ಗ್ರಾಮ ದೇವಾಲಿ ಪ್ರಾರ್ಥನಾ ಕೆಲ್ಲಿ.

ಏಕದಮ್ ಧಡ್ ಧಡ್ ಧಡ್ ಅವಾಜ ಆಯ್ಲೊ. ವಿಮಾನಾನ ಜಮೀನಿಕ ಸ್ಪರ್ಷ ಕೆಲ್ಲೆಂ. ರನ್ನ ವೇ ಚೇರಿ ತೆಂ ಧಾಂವ್ತಸಿಲೆಂ. ದೋನ ಮಿನಿಟಾಂತು ಸಗ್ಳೆಂ ಕಂಟ್ರೋಲಾಂತು ಆಯಿಲೆಂ. ಹಾಂವೆ ಏಕ ದೀರ್ಘ ಶ್ವಾಸ ಸೊಳ್ಳೊ.

ವಿಮಾನಾಂತುಲ್ಯಾನ ಭಾರ್ಯಿ ಪಡ್ತನಾ ದರವಾಜ್ಯಾಂತು ಪಾಯಲೆಟ ರಾಬ್ಬಿಲೊ. ಸಗಳ್ಯಾಂಕ ವಿಶ್ ಕರ್ತಸಿಲೊ. ಏಕ ಇಂಟೆಲಿಜೆಂಟ ಪ್ರೆಸ್ ರಿಪೋರ್ಟರಾನ ವಿಚಾರಿಲ್ಯಾವರಿ ಹಾಂವೆ ಪಾಯಲೆಟಾಕ ವಿಚಾರ್ಲೆಂ. " ತೂಂವೆ ಇತ್ಲ bad weather ಆಸ್ತನಾ , ವಿಮಾನ ಡಾಯವರ್ಟ ಕರ್ನಾಸಿ ಪರತ ಹಾಂಗಾ ಲೆಂಡ ಕೊರ್ಚೆ ಧೈರ್ಯ ಕಸ್ಸಿಂ ಕೆಲ್ಲೆಂ ?"

ತೊ ಮ್ಹಳಾಲೊ , " ಧೈರ್ಯ ನಾಸಿಲ್ಯಾನ ಪಾಯಲೆಟ ಜಾವ್ಚ್ಯಾನಾ. ಅಧೈರ್ಯ ಆಮ್ಗೆಲ ವೈರಿ. ತುಮ್ಮಿ Air-lndia ಚೆ ವಿಮಾನಾರಿ ಫ್ಲಾಯ್ ಕರ್ತನಾ ಭಿವ್ನಾಕ್ಕಾತಿ. ತುಮ್ಗೆಲ ರಕ್ಷಣೆಚಿ ಪೂರ್ಣ ಜವಾಬ್ದಾರಿ ಆಮ್ಮಿ ಘೆತ್ತಾತಿ. ಯೇಯಾ, ಸದಾ ಆಮ್ಮಿ ತುಮ್ಗೆಲ ಸ್ವಾಗತ ಕರ್ತಾತಿ."