एक पत्र अपने माता पिता के नाम , कांगड़ी (हिमाचली भाषा) में #letter

एक पत्र अपने माता पिता के नाम , कांगड़ी (हिमाचली भाषा) में

जय-जया डैडी मम्मी जी,

मिंजो पता है कि तुहां असां जो बड़ा भारी याद करादे, सच्ची गल गलां ता मेरा भी बड़ा गों करा दा कि कालु ए लोकडाउन खुड़े कने कालु मैं तुहां वली चली ओआं, मुन्नू भी रोज़ ग्लान्दा कि नानिया दे घरें जाणा , अपर किया ओणा । जतेड़ी ए लोकडाउन खुड़ी आणा हे ना कन्ने सब बदिया पहले साई होई जाणा ए ना, सारैयां ते पहले मैं तुम्हां वली ओणा ए, फिरी अहाँ सारे मिलिकरी मज़े करगे । बड़े भारी दिन होई गे पलदू खादे, मदरा भी बन्नागे कन्ने खट्टा भी । डैडीयाँ जो भी ता मेरे हथे दी चा बड़ी छैल लगदी । मते धयाड़े होए सोगी गप्पां मारेयो ते कन्ने तुहां सारैयां जो दिखेयो।

भाऊ भाभिया ने भी ता मिलना हे, सै भी रोज़ गला दे कि कालु अहाँ सारे घूमणा जांगे कुतकी सोगी, घरें बई-बई के अक्की गेओ, फिरी भाभिया भी ता अपणे पयोकियाँ ने जाणा होंगा ना ।

मम्मी , इबें मैं मते दिना तिकर तुहां वली रहणा हे, जालु तिकर तुहां गलांगे ना तालु तिकर। हुण ता खरे किते समझा आइया कि माँ-बुढेयाँ बगैर केडा मुश्कल होंदा जीणा, पता नी कालु क्या होई जाणा हे, कुणी कालु चली पोणा हे, कालजा कंबी जा दा ए सोची करी, अपर अहाँ सारैयां भीरी मिलणा हे। तुहां भी बड़े बमार रहदें, टेमे दी दवा खांदे रहनेयो अड़ेयो, डैडी भी कले पई जांदे तिना भी ध्यान रखनेयो। झट ही सब ठीक होई जाणा हे फिरी मैं तुहां दे मुड़े च सोणा हे, मुन्नूये जो भी ता कहानणीयाँ सुनानियाँ हेन तुहां ।

अच्छा , इक गल दसा संझा ब्यागा जोत जलांदे की नी?? बाबे दा सै बाला गीत गांदे की नी, कुण देया भुज़ा भला "वे मनमोनेया बालक नाथा वे तू कदों बुलावेगा", केडा मज़ा ओंदा इस गीते जो गाणे च , जालु अहाँ ओंगे तालु सोगी सोगी गांगे ।

हुण झट ही ऐ लोकडाउन खुड़ने आला ए, फिरी मैं खिटां मारदे तुहां वली ओणा हे ।

तुहां अपणा ध्यान रखनेयो, आली अहाँ सारे घराँ विचि हेन ता बचेयो हेन, होले-होले सब खरा होणा लगेया।

तुहां दी ध्याण

सुनीता पवार