ದೈನಿಕ ಪತ್ತೇದಾರಿ ಧಾರವಾಹಿ ವಾಂಟೊ - 4

ಜಾಲಯಾರಿ ತಾನ್ನಿ ರಡ್ತಾ ಆಸ್ಸತಿ, ರೋಣು ಜಾಂವೊ ಮ್ಹೊಣು ರಾಕ್ತಾ ಬೊಸಚಾಕ ಜಾತ್ವೆ? ತಾಕ್ಕಾ ಆನ್ನೇಕ ಜವಾಬ್ದಾರಿ ತಾಂಡ್ತಾ. ಥಂಯಿ ಆಶ್ಶಿಲೆ ಲೇಡಿ ಪೋಲೀಸಾಕ ಆಪೋನು ತಾಗೆಲೆ ಬಾಯ್ಲ-ಚರ್ಡುವಾಂಕ ದೂರ ಆಪೋನು ವ್ಹರಚಾಕ ಸಾಂಗ್ತಾ. ತೀ ರುದ್ರಪ್ಪಾಲಿ ಬಾಯ್ಲ ರಮಣಿ ಲಾಗ್ಗಿ ಯವ್ನು “ಪಳೆಯಾ ಆಮ್ಮಾ... ತುಮ್ಮಿ ಚಿಕ್ಕೆ ತೆಕ್ಕಡೆ ವಚ್ಚಾ... ಮ್ಹಡೆಚೆ ಮಹಜರು ಕೊರನು ಮ್ಹಡೆಕ ಪೋಸ್ಟಮಾರ್ಟಮಾಕ ವ್ಹರಕಾ. ಹಾಂಗ ತೊಡೊವು ಜಾಲಯಾರಿ ಮುಖಾರಿ ತುಮ್ಕಾಚಿ ವೇಳು ಜಾವ್ಚೆ... ಥಂಯಿ ಆಸ್ಪತ್ರೆಂತು ಡಾಕ್ಟ್ರು ಜವಣಾಕಕಿ, ಟಿಪಿನ್ನಾಕ ಘೆಲ್ಲ ಮ್ಹಳಯಾರಿ ತಾನ್ನಿ ಯವ್ಚೆ ಪರ್ಯಂತ ರಾಬಕಾ ಜಾತ್ತಾ. ತೊಡೋವು ಜಲ್ಯಾರಿ ಪೋಸ್ಟ್‌ಮಾರ್ಟ್ಂ ಆಯ್ಚೆ ಬದಲಾಕ ಫಾಯಿ ಜಾವಚಾಕ ಪುರೊ... ತಿಕ್ಕಾ ಚಿಕ್ಕೆ ಭಿವೈಚ ವರಿ ಮ್ಹಣ್ತಾ. ಹೇ ಪಳೈತಾ ಚಿಕ್ಕ ದೂರ ರಾಬ್ಬಿಲೊ ತಿಗೆಲೊ ಬಾಂವಕಿ, ಸಂಬಂಧಿಕ ಏಕಳೊ ತಿಗೆಲೆ ಲಾಗ್ಗಿ ಯವ್ನು ರಮಣಿಕ ದೂರ ಆಪೋನು ವ್ಹರತಾ. ತಿತ್ಲ ಭಿತ್ತರಿ ಪೋರೆನ್ಸಿಕ್ ತಜ್ಞಾಲೆ ತನಿಖಾ ಸಹಿತ ಸಂಪೂನು ಆಸ್ತಾ. ದಿನೇಶು ಸುತ್ತಾಸ್ಸುಚೆ ಚಾರ್‍ಪಾಂಚ ಗಣ್ಯಾಂಕ ಆಪೋನು ಪಂಚನಾಮೆ ಕೋರ್ನು, ಅಂಬುಲೆನ್ಸಾಕ ಆಪೋನು ದೊನ್ನೀ ಮ್ಹಡೆ ಗವರ್ನಮೆಂಟ್ ಹಾಸ್ಪಿಟಲಾಕ ದಾಡತಾ. ದೊನ್ನೀ ಮ್ಹಡೆ ಪೋಸ್ಟ್‌ಮಾರ್ಟ್ಂ ಜಾವ್ನು ಮೆಳತಾನಾ ಸಾಂಜ್ವಾಳಾ ಜಾವ್ನು ಆಸ್ತಾ. ದೊಗ್ಗಾಲೆ ಸಂಬಂಧಿಕ ಯವ್ನು ಮ್ಹಡೆ ಘೇವ್ನು ವ್ಹರತಾತಿ. 

ಇನ್ಸ್‌ಫೆಕ್ಟರ್ ದಿನೇಶಾಕ ಖಂಚಾನ ಎನ್‌ಕ್ವಾಯರಿ ಸೂರು ಕೊರಕಾ ಮ್ಹಣಚೆ ಕಳ್ನಾಶಿ ವತ್ತಾ. ತೊಂ ರುದ್ರಯ್ಯ ಘರ್‍ಕಡೆ, ತಾಂಗೆಲೆ ಸಂಬಂಧಿಕ ಘರ್‍ಕಡೆ ಸಕ್ಕಡ ವಚ್ಚುನು ಮಾಹಿತಿ ಘೇವ್ನು ಎತ್ತಾ. ತಶ್ಶೀಚಿ ರುದ್ರಯ್ಯ ಒಟ್ಟು ಮ್ಹಡೆ ಜಾಲೀಲೊ ತಾಗೇಲೆ ದೋಸ್ತ ವರುಣಾ ಘರ್‍ಕಡೆ ಸಹಿತ ವಚ್ಚುನು ಮಾಹಿತಿ ಘೇವ್ನು ಎತ್ತಾ. ದೊಗ್ಗಾಲೆಂ ಸಂಬಂಧಿಕಾಂಕ ಕೋಣ್ತರಿ ತಾಂಗೆಲೆ ದುಶ್ಮನ್ ಆಸ್ಸತಿ; ತಾನ್ನಿ ಹಾಂಕಾ ಖೂನಿ ಕೆಲ್ಲೆ ಮ್ಹೊಣು ಸಂಶಯು ಪಾವಚಾಕ ಸಹಿತ ಜಾಯ್ನಾ. ಕಿತಯಾಕ ಮ್ಹಳಯಾರಿ ರುದ್ರಯ್ಯ ಮಸ್ತ ಗರೀಬ ಕುಟುಂಬಾಚಾನ ಆಯ್ಯಿಲೊ ಮನುಷ್ಯು. ಸಾನ್ಪಣಾಂತು ಖಾಣ -ಜವಣಾಕ ಸಹಿತ ಮಸ್ತ ಕಷ್ಟ ಆಶ್ಶಿಲೆ ಖಂಯಿ. ಪಾಡ ಪಾವ್ನು ಪೆಂಟಾಕ ಯೋ(ಕೆಟ್ಟು ಪಟ್ಟಣ ಸೇರು) ಮ್ಹಣಚೆ ಆದ್ಗತಿ ಪ್ರಮಾಣೆ ಹಾತ್ತಾಂತು ಚಾರ್‍ಕಾಸು ಸಹಿತ ನಾಶಿ ತೊಂ ಪೆಂಟಾಕ ಎತ್ತಾ. ಹಾಂಗಾ ಉಪವಾಸ, ವನವಾಸ ಕೊರನು, ಎ.ಪಿ.ಎಮ್.ಸಿ. ಯಾರ್ಡಾಂತು ಚೀಲ ವ್ಹೋವ್ನು ಆಪಣಾಲೆ ದಿವ್ಸಾಚೆ ಖರ್ಚು ಜೋಡ್ನು ಘೆತ್ತಾಶ್ಶಿಲೊ. ಕಷ್ಟ ಜೀವಿ, ಖಂಚೇಯಿ ದುರ್ವ್ಯಸನ ನಾಶಿಲೆ. ತ್ಯಾ ಕಾರಣಾನ ಚಾರ ಕಾಸು ಹಾತ್ತಾಂತು ಉರಲೆ. ತ್ಯಾ ಸಂದರ್ಭಾರಿ ಹಾಣೆ ಭಾಡೇಕ ಆಶ್ಶಿಲೆ ಘರ ರಮಣಿಲೆ ಆನ್ನಾಲೆ ಆಶ್ಶಿಲೆ.