ದೈನಿಕ ಧಾರವಾಹಿ ವಾಂಟೊ - 6

ವರುಣಾನ ಸಾಂಗಿಲ ವರಿ ರುದ್ರಯ್ಯ ಬಾಯ್ಲೆಲೆ ನಾಂವಾಂತು ಆಶ್ಶಿಲೆ ಜಾಗೋ ಎನ್.ಎ., ಡೆವಲಪ್‌ಮೆಂಟ್ ಕೊರೊಸೂನು ೩೦ಘಿ೪೦, ೬೦ಘಿ೪೦ ಸೈಜಾಚೆ ಪ್ಲಾಟ್ ಕೊರನು ವಿಕ್ತಾ. ಎಕ್ಕಾಕ ದೋನ ವಾಂಟೊ ದುಡ್ಡು ಮೆಳ್ತಾ. ತ್ಯಾ ದುಡ್ವಾನ ಆನ್ನೇಕ ಕಡೇನ ಜಾಗೋ ಘೇವ್ನು ಥಂಯಿ ಸಹಿತ ರಿಯಲ್ ಎಸ್ಟೇಟ್ ಬಿಜಿನೆಸ್ ಮುಖಾರ್‍ಸಿತಾ. ತಾಜ್ಜೆ ಮುನಾಪೇನ ಘರ-ದಾರ ಕೋರ್ನು ಘೆತ್ತಾ. ಬಾಯ್ಲೆಕ ಬಾಂಗ್ರಾ ದಾಗೀನ ಕೊರೊನು ಘಾಲತಾ. ಕಾರ ಘೆತ್ತಾ... ವ್ಹಡ ಮನುಷು ಜಾತ್ತಾ. ಬಿಜಿನೆಸ್ ವಾಡ್ಲೆ ಸತ್ತಾ ಟೆನ್‌ಶನ್ ಸಹಿತ ಚ್ಹಡ ಜಾತ್ತಾ. ಚಿಕ್ಕೆ ಬಾಟ್ಲಿ ಅಭ್ಯಾಸು ಸಹಿತ ಸೂರ ಕೊರನು ಘೆತ್ತಾ.

ವರುಣಾಲೆ ಮಾಹಿತಿ ಚ್ಹಡ ಖಾಂಯಿ ನಾ. ಬಿ.ಎ. ಡಿಗ್ರಿ ಕೆಲಯಾರಿ ಸಹಿತ ಚಾಂಗ ಕಾಮ ಮೇಳನಾಸ್ತನಾ ತೊಂ ರಿಯಲ್ ಎಸ್ಟೇಟ್ ಬ್ರೋಕರ ಜಾತ್ತಾ. ರುದ್ರಯ್ಯಲೆ ದೋಸ್ತಿ ಕೊರಚೆ ಪರ್ಯಂತ ಖಾಲಿ ಖಾಣ-ಜವಣಾಕ ಪುರ್‍ಜಾತ್ತಾಶ್ಶಿಲೆ ತಾಗೇಲೆ ಉತ್ಪನ್ನ ಆತ್ತ ಚಿಕ್ಕೆ ಚ್ಹಡ ಜಾಲೀಲೆ. ಪ್ರಾಮಾಣಿಕ ಮನುಷು. ಕೆದ್ನಾಯಿ ರುದ್ರಯ್ಯಾಕ ಫಸಯ್ಕಾ, ಅನ್ಯಾಯು ಕೊರಕಾ ಮ್ಹಣಚೆ ವಿಚಾರು ಸಹಿತ ತಾಗೇಲೆ ಮಾತ್ತೆಂತು ನಾಶ್ಶಿಲೆ. 

ಹೇ ವಿಷಯು ಏಕ್ಕಾಕ ಏಕ ಗಾಂತಿತಾ, ಆಪಣಾಲೆ ಎನ್‌ಕ್ವಾಯರಿಕ ಏಕ ಸಾನಪೂಣಿ ಸಾಕ್ಷಿ ಮೆಳತಲೆ ಮ್ಹಣಚೆ ಇನ್ಸ್‌ಫೆಕ್ಟರಾಲೆ ಆಶಾ ಪೂರ್ತಿ ಜಾವಚೆ ಲಕ್ಷಣ ತಾಕ್ಕಾ ದೀಸ್ನಾ.  ಜಾಲ್ಯಾರಿ ಮಧ್ಯೆ ಮಧ್ಯೆ ರಮಣಿಲೆ ಬಾಪ್ಪುಲಿ ಏಕಳೊ ಪರ್‍ಪರತ ಯವ್ನು ‘ಎನ್‌ಕ್ವಯರಿ ಖಂಯಿ ಪರಂತ ಆಯ್ಲೆ, ಆಮ್ಗೆಲೆ ಘರಾಣಿಚೆ ಜಾಂವಯಾಕ ಕೋಣ ಮಾರ್ನು ಕಾಳ್ಳೆ ಮ್ಹಣಚೆ ಕಳ್ಳೆವೇ? ಮ್ಹೊಣು ನಿಮ್ಗೂನು “ನಾ.. ಮ್ಹಳ್ಳ ಸತ್ತಾ “ತುಮ್ಮಿ  ಪೂರಾ ಅಪ್ರಯೋಜಕ...ಮಾಕ್ಕ ಗೊತ್ತಾಸ್ಸ ತುಮ್ಮಿ ಖೂನಿಗಾರಾ ಲಾಗ್ಗಿ ದುಡ್ಡು ಘೇವ್ನು ಆಮ್ಕಾ ಫಸಯ್ತಾ‌ಆಸ್ಸತಿ. ಹಾಂವ ಚೀಪ್ ಮಿನಿಸ್ಟ್ರಾಕ ಲೆಟರ್ ಬರೈತಾ, ರಾಷ್ಟ್ರಪತಿಕ ಕಂಪ್ಲೆಂಟ್ ದಾಡತಾ ಮ್ಹೊಣು ಅವಾಜ ಘಾಲ್ನು ವತ್ತಾಶ್ಶಿಲೊ. ತೆದನಾ ಹಾಗೇಲೆ ಬೋಡ ಕತಕತ ತಾಪ್ಪೋನು ವತ್ತಾಶ್ಶಿಲೆ.  ತಾಗೆಲೆ ನಾಂವ ಕೈಲಾಸ. ಕೈಲಾಸಾಲೆ ಉತ್ರಾನಿ ಮಾತ್ತೆ ಗರಂ ಜಾವ್ನು ಇನ್ಸ್‌ಫೆಕ್ಟರು ಪೋಸ್ಟ್‌ಮಾರ್ಟಂ ಕೆಲೀಲೆ ಡಾಕ್ಟರಾಕ ಪೋನ್ ಕರತಾ. ತಾಕ್ಕ ಜಾಲ್ಯಾರಿಚಿ ಮರಣ ಅಶ್ಶೀಚಿ ಘಡಲಾ ಮ್ಹೊಣು ಖಾತ್ರಿ ಜಾವ್ನು ಸಾಂಗಚೆ ತಸ್ಸಲೆ ಖಂಚೇ ಸಾಕ್ಷಿ ಮೇಳ್ನಿ ಆಶ್ಶಿಲೆ. ತ್ಯಾ ಖಾತ್ತಿರಿ ತೊಂ ಸಾಂಗ್ತಾ “ಮಾಕ್ಕಾ ಆನ್ನಿಕೆ ಥೊಡೆ ಕಾಳ ಜಾವ್ಕಾ ಪಡ್ತಲೆ ಸಾರ್ ಮ್ಹೊಣು. “ಬಹುಶಃ ಹೇವಯಿ ಸಾಕ್ಷಿ-ಆಧಾರ ನಾಶಿ ಕೇಸ್ ಕ್ಲೋಸ್ ಕೊರಚೆ ಫಾವ ಎತ್ತಲಿ ಕಿತ್ಕಿ? ಮ್ಹಣ್ಚೆ ಯೆಚ್ಚನ ದಿನೇಶಾಕ ಯವಚಾಕ ಲಾಗ್ಲೆ.