ಸುಖಾಚೆ ಪಾವಲಿ -10

ದೇವಾನಿ ಆಮ್ಕಾ ದುಡ್ಡು ದೀನಿ, ಆಸ್ತಿ ದೀನಿ, ಕೀರ್ತಿ-ಪ್ರತಿಷ್ಠಾ ದೀನಿ ಮ್ಹೊಣು ಕರಬೂಚೆ ಲೋಕ ಹರ್‍ಯೇಕ ಬಗಲೇನ ದೆಕ್ಕು ಪಡತಾತಿ. ತಶ್ಶೀಚಿ ದುಡ್ಡು, ಕೀರ್ತಿ ಆಸ್ಸುನು ಗಮಂಢಿಪಣ ದಾಕೈತಾ ಮೆರ್‍ವಚೆ ಲೋಕ ಸಹಿತ ದೆಕ್ಕು ಪಡತಾತಿ. ಹಾಂಗೆಲೆ ಮಧ್ಯೆ ಕಷ್ಟ ಸಹಿಷ್ಣು ಜಾವ್ನು ನಿರಂತರ ಕಾಮ ಕರತಾ, ಮೆಳ್ಳಿಲ್ಯಾಂತು ತೃಪ್ತಿ ಪಾವಚೆ ಲೋಕ ಸಹಿತ ಆಸ್ಸತಿ. ಹಾನ್ನಿ ತಿಗ್ಗಽಚಿ ಮನುಷೂಚಿ; ಜಾಲ್ಯಾರಿಚಿ ಹಾಂಗೆಲ ಮಧ್ಯೆ ಕಿತ್ತುಲೆ ಫರಕ ಆಸ್ಸ ಪಳೆಯಾ! ವ್ಹಯಿ ಹಾಕ್ಕಾಚಿ ವೈವಿಧ್ಯತಾ, ವಿವಿಧತಾ ಮ್ಹಣಚೆ. ಕಶ್ಶಿ ಆಮಗೇಲೆ ಹೇ ಜೀವನಾಂತು ಬಾಲ್ಯ, ಯೌವನ, ಮಾಂತಾರಪಣ ಮ್ಹೊಣು ಆಸ್ಸಕೀ ಆತ್ಮಾಕ ಸಹಿತ ತಸ್ಸಲೇಚಿ ಅವಸ್ಥಾ ಆಸತಾ. ಕಿತ್ಲೆ ಆಸಲೇರಿಚಿ ಖಾಂಯಿ ನಾ ಮ್ಹೊಣು ಕರಬಿತಾಲೊ ಆಸ್ಸ ಪಳೆಯಾ ತಾಗೆಲೆ ಆತ್ಮ ಆನ್ನಿಕೆ ಬಾಲ್ಯಪಣಾಂತು ಆಸ್ಸ. ಆತ್ಮಜ್ಞಾನಾಚೆ ವಾಟ್ಟೆರಿ ತಾಜ್ಜ ಪ್ರಯಾಣ ಆನ್ನಿಕೆ ಆರಂಭ ಜಾಯ್ನಿ. ದುಸರ್‍ಯಾಂಕ ಖೊಂಚೆತಾಲೊ, ದುಸ್ರ್ಯಾಲೆ ಕಾಂಪತಾಲೊ ತಾಂಗೆಲೆ ಆತ್ಮ ಸಹಿತ ಬಾಲ್ಯಪಣಾಚೆ ಆತ್ಮಚಿ. ಆನಿ ದುಡ್ಡು, ಸಂಪತ್ತ, ಅಧಿಕಾರ, ಕೀರ್ತಿಕ ಭೂಲ್ನು ಗಮಂಢಿಪಣ ದಾಖಯಚೆ ಲೋಕ ಆಸ್ಸಾ ಪಳೆಯಾ ತಾಂಗೆಲೆ ಆತ್ಮ ಯೌವನಾಂತು ಆಸ್ತಾ. ಆನಿ ಕಸಲೇ ಕಷ್ಟ, ನಷ್ಟ, ದುಃಖ-ದುಮ್ಮಾನ, ಸುಖ-ಸಂತೋಷ ಆಯಲೇರಿಚಿ ಹೆತಾಂತು ಬಾವ್ನಾಶಿ, ಭೂಲ್ನಾಶಿ ಆಸ್ತಾ ಪಳೆಯಾ ಖರೇಚಿ ತಾನ್ನೀಚಿ ಆತ್ಮ ಸಾಕ್ಷಾತ್ಕಾರಾಕ ಮಸ್ತ ಲಾಗ್ಗಿ ಉರ್ನು ಆಸತಾತಿ. ತಾಂಗೆಲೆ ಆತ್ಮ ಜೂನ ಜಾವ್ನು ಆಸತಾ.

ಆತ್ಮ ಶರೀರ ಮ್ಹಣಕೆ ನ್ಹಂಹಿ. ತಾಕ್ಕಾ ಖಾಂಯತರಿ ಕೂಸ್ಸಡ ಲಾಗ್ಗೂನು ಆಸ್ಸುಚಾಕ ಪುರೊ. ಜಾಲ್ಯಾರಿ ಮರಣ ನಾ. ತಶ್ಶಿ ಜಾಲ್ಯಾರಿ ತಾಂತು ಜೂನ, ತರನೆ ಮ್ಹೊಣು ಬೇಧ ಕೊರಚಾಕ ಕಶ್ಶಿ ಜಾತ್ತಾ? ತರನೆ ಮ್ಹಳಯಾರಿ ಜ್ಞಾನ ಆನಿ ವಿವೇಕ ನಾಶಿಲೆ ಶರೀರಾಂತು ಆಸ್ಸುಚೆ ಆತ್ಮ. ಜೂನ್ ಮ್ಹಳಯಾರಿ ಪಿಕಚಾಕ ತಯಾರ ಜಾವ್ನು ಆಶ್ಶಿಲೆ ಮ್ಹಳಯಾರಿ ಹರಿಕೃಪೆಕ ಸಾಮರ್ಥ್ಯ ಆಸ್ಸುಚೆ ಆತ್ಮ ಮ್ಹೊಣು ಸಮಜೂಕಾ. ಹಾತು, ಪಾಯು, ನಾಂಕ, ದೋಳೆ, ಕಾನ ನಾತ್ತಿಲೆ ಜಾಲಯಾರಿಚಿ ಮನೀಶು ವಾಂಚತಾ. ಜಾಲಯಾರಿ ಹರದೆ, ಕಿಡ್ನಿ, ಮೆದುಳು ನಾತಲೇರಿ ತಾಕ್ಕಾ ವಾಂಚುಕ ಜಾಯನಾ. ಮ್ಹಳಯಾರಿ ಬಾಯರಿ ಆಮಕಾ ದಿಸಚೆ ಮಾತ್ರ ಶರೀರ ಮ್ಹೊಣು ಸಮಜೂನು ತಾಜ್ಜೆ ಚಂದಾಯಿ, ರಕ್ಷಣೆಕ ಚ್ಹಡ ಚ್ಹಡ ಮಹತ್ವ ದಿತ್ತಾ ಆಸ್ಸುಚೆ ಆಮ್ಮಿ ಹರದೆ, ಕಿಡ್ನಿಚೆ ರಾಕವಣಾಕ ಮಹತ್ವ ದಿವಕಾ ಪಡತಾ. ತಶ್ಶಿಚಿ ದುಡ್ಡು, ಆಸ್ತಿ, ಕೀರ್ತಿ ಖಾತೆರಿ ವಾವರೊ ಕೊರಚೆ, ಗರ್ವ ಪಾವಚೆ ಬದಲಾಕ ಆತ್ಮಸಾಕ್ಷಿಕ ಸಮಜಾವ್ನು ಚಮಕೂಚೆ ಅಭ್ಯಾಸು ಕೊರಚೆ ಚಾಂಗ. ಆಮಗೇಲೆ ಭಿತೇರಿ ಗರ್ವ ಉತ್ಪನ್ನ ಜಾವಚ ಭಿತೇರಿ ವಿವೇಕಾಚೊ ಕಿಟಕಿ ಉಗಾಡೊ. ತೆದ್ದನಾ ತುಮಕಾ ಕಳತಾ ಹೇ ದುಡ್ಡು, ಆಸ್ತಿ, ಕೀರ್ತಿ ಸಕ್ಕಡ ದೇವಾನ ದಿಲೀಲೆ ಉಡ್ಗಿರೆ, ಹಾಜ್ಜ ಖಾತೆರಿ ಹಾಂವೆ ಗರ್ವ ಪಾವಚೆ ತಾಕೂನು ದೇವಾಕ ಹಾಂವೆ ಅಪಮಾನು ಕೆಲೀಲ್ವರಿ ಜಾತ್ತಾ. ಸಾಧ್ಯ ಜಾಲಯಾರಿ ಹಾಜೇನ ಚಾರ ಲೋಕಾಲೆ ತೊಂಡಾ ವಯರಿ ಹಾಸು ಹಾಡೊಚಾಕ ಜಾಲಯಾರಿ, ಕಷ್ಟ, ದುಃಖಾಂತು ಆಸ್ಸುಚೆ ತಾಂಗೆಲೆ ಮನಾಕ ಸಮಾಧಾನ ಯವಚೆ ವರಿ ಕೊರಚಾಕ ಜಾಲಯಾರಿ ತಾಜ್ಜಪಶಿ ವ್ಹಡ ದೇವಾಲೆ ಪೂಜಾ ಆಸ್ಸನಾ. 

ತಶ್ಶಿಚಿ ದೇವಾನಿ ಆಮ್ಕಾ ಖಾಂಯಿ ದೀನಿ ಮ್ಹೊಣು ಕರಬೂಚೆ ಲೋಕಾನಿ ಸಹಿತ ದೇವಾನಿ ಆಮಕಾ ಹಾತು, ಪಾಯು, ದೋಳೆ, ಕಾನ ಸಕ್ಕಡ ದಿಲ್ಲಾ. ಹೇ ನಾಶಿ ವಾಂಚೆ ನತದೃಷ್ಟ ಪಶಿ ಆಪ್ಪಣ ಚಾಂಗ ಸ್ಥಿತಿಂತು ಆಸ್ಸ. ಆಪಣಾನ ಕೂರ್‍ಟ ಬಗಸೂನು ಜೊಡಲ್ಯಾರಿ ಮುಖಾರಿ ಏಕ ದಿವಸು ಹಾಂವಯಿ ದುಡ್ವಾಳು, ಕೀರ್ತಿವಾನ ಜಾತ್ತಾ ಮ್ಹೊಣು ಹಠಾನಿ ಸಾಧನೆಕ ದೆಂವ್ಕಾ. ಸೂರಸುರವೇಕ ಅಪಜಯ ಮೆಳಯಾರೀಚಿ ಸಾಧನಾ ಸೊಡಚಾಕ ನಜ್ಜ. ಶ್ರೀ ಕೃಷ್ಣ ಪರಮಾತ್ಮಾನಿ ಸಾಂಗಿಲ್ವರಿ ‘ಕೆಲೀಲೆ ವಾವರೊ ಕೆದನಾಂಯಿ ವ್ಯರ್ಥ ಜಾಯನಾ. ಆಜಿ ನ್ಹಂಹಿ ಫಾಯಿ ಪೂಣಿ ಪ್ರತಿಫಲ ಮೇಳ್ನೂ ಮೆಳ್ತಾ. ಹೇ ಭರ್‍ವಸ ಕೆದನಾಂಯಿ ದವರೂನು ಘೆವುಕಾ.