ಸುಖಾಚೆ ಪಾವಲಿ -3

ನ ದೈವಬಲಮಾಶ್ರಿತ್ಯ ಪಾಪಕರ್ಮರತಿರ್ಭವೇತ್

ಆಜ್ಞಾನದ್ವಾ ಪ್ರಮಾದಾದ್ವಾ ದಹತೆ ಕರ್ಮ ನೇತರೇತ್||

ಹೇ ಅಂಗೀರಸ ಸ್ಮೃತಿಂತುಲೆ ೧೦೨ವೆಂ ಶ್ಲೋಕ. ಮ್ಹಳಯಾರಿ ದೇವಾಂಗೆಲೆ ವರಪ್ರಸಾದ, ಶಾಸ್ತ್ರಾಚೆ ಬಲ ಜಾಂವೊ ಮಾಗಿರಿ ಹಾಕ್ಕಾ ಪ್ರಾಯಶ್ಚಿತ ಕೊರನು ಘೆತಲಾರಿ ಸೈ ಮ್ಹಣಚೆ ಭಾವನಾ ದವರೂನು ಘೆವನು ಪಾಪ ಕೊರಚಾಕ ನಜ್ಜ. ಅಶ್ಶಿ ಕೊರಚೆ ನಿಮಿತ್ತ್ಯಾನಿ ದೇವಾಪರಾಧಾಕ, ಶಾಸ್ತ್ರಾಪರಾಧಾಕ ಜಾಂವೊ ಪ್ರಾಯಶ್ಚಿತ ಸಂಬಂಧಾಚೆ ಅಪರಾಧಾಕ ಶಿರಕೂಕಾ ಜಾತ್ತಾ. ನಿಂದ್ಯ ಕರ್ಮಾಂಕ ಜ್ಞಾನಾಜ್ಞಾನಾನಿ ಜಾಂವೊ ಆಕಸ್ಮಿಕ ಜಾವನು ಕೆಲಯಾರಿ ವರೇನ ತ್ಯಾ ಪಾಪ ಕರ್ಮಚಿ! ತ್ಯಾ ಆಮಕಾ ಚೂಕನಾಶಿ ಲಾಗತಾ. ಆನಿ ತಾಜೆ ವಾಯಟ ಫಲ ಆಮ್ಮಿ ಭೊಗ್ಗುಕಾ ಜಾತ್ತಾಚಿ! 

ಅಂಗೀರಸ ಮಹರ್ಷಿಲೆ ಜ್ಞಾನ ಕಿತ್ಲೆ ಉಚ್ಛ ಆನಿ ಸುಂದರ ಆಸ್ಸ ಪಳೆಯಾ. ಪ್ರಾಣಿ ಹತ್ಯಾ ಮಹಾಪಾಪ ಮ್ಹೊಣು ಸಕಟಾಂಕ ಗೊತ್ತಾಸ್ಸ. ಜಾಲಯಾರಿ ಖಂಚಕಿ ಏಕ ಜನಾಂಗಾಂತು ಆಮ್ಗೆಲೆ ಮ್ಹಾಲಗಡೆ ಪ್ರಾಣಿ ಶಿಕಾರ ಕೊರನು ಹಾಡ್ನೂ ಪರಬ ಆಚರಣ ಕರತಾ ಆಶ್ಶಿಲೆ ಖಂಯಿ, ಆಮ್ಮೀ ತಶ್ಶೀಚಿ ಕರತಾತಿ ಮ್ಹೊಣು ಪ್ರಾಣಿ ಹತ್ಯಾ ಕೆಲಯಾರಿ ತ್ಯಾ ರಿವಾಜ ಮ್ಹೊಣು ಕೆಲಯಾರೀಚಿ ತ್ಯಾ ಅಪರಾಧಾಚೆ ಪಾಪ ಆಮಕಾ ಲಾಗ್ತಾ. ಆಮಕಾ ಅಪರಾಧ ಮ್ಹೊಣು ಗೊತ್ತಾಸ್ಸುನು ತಾಂತುಲೆ ಏಕ ವಾಂಟೊ ಪಾಪ ಪರಿಹಾರಾ ಖಾತ್ತಿರಿ ದೇವಾಕ ಘಾಲಯಾರಿ ಸೈ ಮ್ಹೊಣು ಕಾಂಪಿಲೆ ಜಾಂವೊ ಫಸೋನು ಘೆತ್ಲೆ ಮ್ಹೊಣು ಜಾಲಯಾರಿ ವರೇನ ತ್ಯಾ ಪಾಪಚಿ!

ಪಾಪ ಆನಿ ಪುಣ್ಯಾಚೆ ಚಿಂತಾಲ(ತಕ್ಕಡಿ) ಮಸ್ತ ಸೂಕ್ಷ್ಮ ಆಸ್ತಾ. ಕೆಲವ ಲೋಕ ಮೆಗೆಲಾಗ್ಗಿ ದುಡ್ಡು, ಆಸ್ತಿ ಆಸ್ಸ, ಆಪ್ಪಣ ಪುಣ್ಯವಂತು ತ್ಯಾ ಕಾರಣಾನಿ ಆಪಣಾನಿ ಕಸ್ಸಲೆ ಕೆಲಯಾರೀಚಿ ಚಲ್ತಾ ಮ್ಹಣಚೆ ಗರ್ವಾನಿ ಆಸತಾತಿ. ವ್ಹಯಿ ತಾನ್ನಿ ಪುಣ್ಯವಾನ ಆಸ್ಸುಚಾಕ ಪುರೊಂತಿ. ತಾನ್ನಿ ಜಾಂವೊ ತಾಂಗೆಲೆ ಕುಟುಂಬಾಚೆ ಕೋಣ್ತರಿ ಕೆಲೀಲೆ ಪುಣ್ಯಫಲಾನಿ ತಾಂಕಾ ಅಪರಿಮಿತ ಶ್ರೀಮಂತಿಕಾ ಆನಿ ಸೂಖ ಮೇಳ್ನು ಆಸ್ಸುಚಾಕ ಪುರೊ. ತಾಜೇನಿ ದಾನ-ಧರ್ಮ ಕೊರನುಕಿ, ಅನ್ನದಾನ ಕೊರನು ಜಾಂವೊ ಸಾರ್ವಜನಿಕ ಸುವಿಧಾ ಆಸ್ಸ ಕೊರಚಾಕ ಮದತ್ ಕೊರನು ಆನಿ ಇತ್ಲೆ ಪುಣ್ಯ ಜೊಡಕಾ. ಅಶ್ಶಿ ಮ್ಹೊಣು ಶಾಸ್ತ್ರಾಂತು ಸಾಂಗಿಲೆ ಆಸ್ಸ. 

ಹೇ ಜಗಾಂತುಲೆ ಕೋಟಿಗಟ್ಲೆ ಲೋಕಾಂಕ ಪಳೇಯಾ. ತಾಂತು ದೋಳೆ ನಾತ್ತಿಲೆ, ಹಾತ್ಪಾಯು ನಾತ್ತಿಲೆ, ಕಾನ ಆಯ್ಕನಾತ್ತಿಲ್ಯಾಂಕ ಸೊಡಾ. ಆಮ್ಗೆಲೆ-ತುಮ್ಗೆಲೆ ವರಿ ಸುಟಸುಟಿ ಜಾವ್ನು ಸಮ್ಮ ಆಸ್ಸುಚೆ ಕಿತ್ಲೆ ಲೋಕಾಂಕ ಏಕ್ಚೂರು ಜ್ಞಾನ ನಾ. ಕಿತಯಾಕ ಅಶ್ಶಿ. ಕೆಲವ ಲೋಕ ಜನಮಾಕ ಯತ್ತಾನಂಚಿ ಜ್ಞಾನಿ, ಪ್ರತಿಭಾವಂತ ಜಾವ್ನು ಯತ್ತಾತಿ. ಆನಿ ಕೆಲವ ಲೋಕ ಚಿಕ್ಕೆ ಪ್ರಯತನ ಕೊರಚೆ ಭಿತ್ತರಿ ಜ್ಞಾನ, ಪ್ರತಿಭಾ ಪ್ರಕಾಶನ ಕೊರಚಾಕ ಶಕ್ತಾತಿ. ಕೆಲವ ಕುಟುಂಬ ಪಳೆಯಾ ಬಾಯ್ಲ, ಬಾಮ್ಮುಣು, ಚರಡುಂವ ಪಳಯಲಾರಿ ಏಕಳ್ಯಾಲೆ ಗುಣಾ ವರಿ ಆನ್ನೇಕ್ಲ್ಯಾಲೆ ಗೂಣ ಆಸ್ತಾ. ಹೇ ಸಕ್ಕಡ ಪಳಯತಾನಾ ಆಮ್ಮಿ ಕೆಲೀಲೆ ಪಾಪ ಆನಿ ಪುಣ್ಯಾಚೆ ಫಲ ಆಮ್ಮಿ ಖಾವ್ಕಾ ಮ್ಹಣಚೆ ಶಾಸ್ತ್ರ ವಾಕ್ಯಾಕ ಪ್ರಮಾಣ ಆಶ್ಶಿಲ ವರಿ ದೀಸ್ನಾವೇ? ತ್ಯಾ ಕಾರಣಾನಿ ಖಂಚೇಯಿ ಪಾಪ ಕಾರ್‍ಯ ಕೊರಚೆ ಪಯಲೆ ತಾಜ್ಜೆ ಫಲಾಫಲ ಖಾತ್ತಿರಿ ಚಿಕ್ಕೆ ವಿಚಾರು ಕರಾ. ಕೊರಚೆ ಪಾಪ ಖಂಚೇಯಿ ಆಸ್ಸೊ ವಾಯಟ ಕರ್ಮಾಕ ವಾಯಟ ಫಲ ಮ್ಹಣಚೆ ಶತಃಸಿದ್ಧ. ನಾತಲೇರಿ ಭಾರತಾಂತು ಇತ್ಲೆ ವ್ಹಡ ಪ್ರಮಾಣಾರಿ ಸಂತ, ಸಿದ್ಧಪುರುಷ ಜನ್ಮಿನಾ ಆಶ್ಶಿಲೆ. ತಾನ್ನಿ ವಿದೇಶಾಂತು ಕಿತಯಾಕ ಜನ್ಮಿನಿ ಹೇ ತರ್ಕಾಕ ತುಮಕಾ ಜವಾಬ ಮೆಳ್ತಲವೇ ಸಾಂಗಾ.

ಸಕಟಾಂಕ ದೇವು ಬರೆಂ ಕೊರೊ

Argodu Suresh Shenoy