ದೈನಿಕ ಧಾರವಾಹಿ ವಾಂಟೊ 5

ಏಕ ಎಕ್ಸಿಡೆಂಟಾಂತು ರಮಣಿ ಬಾಪಯಿ ರಾಯಪ್ಪು ಆನಿ ಬಾಂವು ರಮೇಶು ದೊಗ್ಗಚಿ ದುರ್ಮರಣ  ಪಾವತಾತಿ. ಘರಾಕ ದಾರ್‍ಲ ದಿಕ್ಕ ನಾತ್ತಿಲೆ ತೆದ್ದನಾ ರಮಣಿಲೆ ಅವಯಿಲೆ ದೇರಾ ಬಗೇಚಿ ಎವ್ನು ರೌಡಿಪಣಾಂತು ರಾಯಪ್ಪಾಲೆ ಆಸ್ತಿ ಮಾರನು, ರಮಣಿ ಆನಿ ತಿಗೆಲೆ ಅವಯ್ಕ ಬಾಯರ ದುಂಗೂಳ್ಚಾಕ ಪ್ರಯತ್ನ ಕರತಾತಿ. ತೆದ್ದನಾ ತ್ಯಾ ಬಾಯ್ಲಮನ್ಶೆಲೆ ಪಾಟಿಬಲಾಕ ರಾಬ್ಬಿಲೊ ರುದ್ರಯ್ಯ. ಆನಿ ಆಸ್ತಿ ಪೂರಾ ಹಾಂಕಾಯಿ ಮೆಳಚಾಕ ಸಹಿತ ತಾಣೆ ಮಸ್ತ ವಾವರೊ ಕೆಲೀಲೆ. ತೆದ್ದನಾ ರುದ್ರಯ್ಯ ರಮಣಿ ಘರ್‍ಚಾಕ ಮಸ್ತ ಲಾಗ್ಗಿಚೊ ಜಾಲ್ಲೊ. ಹಾತ್ಮುಳಾಂತೂ ಇತ್ಲೆ ಚಾಂಗ ಚಾಲ್ಲೆಕ ದವರೂನು ಆನಿ ಖಂಯ ಖಂಯ್ಕಿ ಸೊದ್ದುನು ಧೂವ್ಯಾಕ ದುರ್ವ್ಯಸನ, ದುರ್ಗುಣಾಚೆ ಚಾಲ್ಲೊ ಬಾಮ್ಮುಣು ಜಾವ್ನು ಮೆಳಯಾರಿ ಕಸ್ಸಲೆ ಕೊರಚೆ ಮ್ಹೊಣು ಭೀವ್ನು ರಮಣಿಕ ತಿಗೇಲಿ ಅವಯಿ ರುದ್ರಯ್ಯಾ ಬರಶಿ ವ್ಹರಡಿಕ ಕೊರನು ದಿತ್ತಾ. 

ಮುಖಾರಿ ಥೊಡೆ ಕಾಲಾಂತೂ ರಮಣಿ ಅವಯಿ ಹುಷಾರ ನಾಶಿ ಸರಲೊ. ತೆದ್ದನಾ ಪೂರಾ ಆಸ್ತಿ ರಮಣಿಲೆ ಜಾಲೆ; ದೇಡ ಎಕ್ರೆ ಗೆದ್ದೊ, ಭಾಡೆ ಯವಚೆ ಚಾರ್‍ಪಾಂಚ ಘರ. ತಿತ್ಲೆ ಆಸ್ತಿ ಆಪಣಾಲೆ ನಾವಾಕ ಎತ್ತಾ ಮ್ಹೊಣು ಆಯಕೂನು ತೀ ಕಡಕಡ್ತ್ತಾ. “ನಾಕ್ಕಭ... ಪಯಲೇಚಿ ಮೆಗೆಲೆ ಬಾಪ್ಪಾ ಪೈಕಿಚಾಂಕ ಆಮ್ಕಾ ಪಳೇಯಲ್ಯಾರಿ ಜಾಯನಾ. ಕಡೇರಿ ಹೇ ಆಸ್ತಿ ಖಾತ್ತಿರಿ ತಾನ್ನಿ ತುಮ್ಕಾ ಜಾಂವೊ ಮಾಕ್ಕಾ ಖಾಂಯ್ಪೂಣಿ ಕೆಲಯಾರಿ ಕಸ್ಸಲೆ ಕೊರಚೆ? ಪಯ್ಲೆ ಹೇ ಆಸ್ತಿ-ಪಾಸ್ತಿ ಪೂರಾ ವಿಕ್ಕೂನು ವಿಂಗಡ ಬಗಲೇನ ಘರ-ದಾರ ಕರಾ. ಮ್ಹೊಣು ತೀ ಬಾಮ್ಣಾಕ ಒತ್ತಾಯು ಕೆಲ್ಲಿ.. ಬಾಯ್ಲೆಲೆ ಉತ್ತರ ಕಾಣು ಘಾಲಚಾಕ ಜಾಯನಾಶಿ ರುದ್ರಯ್ಯ ಆಸ್ತಿ ಪೂರಾ ವಿಕ್ಕಾ ಮ್ಹೊಣು ಬ್ರೋಕರ ಲಾಗ್ಗಿ ಘೆಲೀಲ ತೆದ್ದನಾ ತಾಕ್ಕ ವರುಣು ಮೆಳ್ಳೊ “ನುಸ್ತೆ ಆಸ್ತಿ, ಘರ ಆಡ್ಡಾದುಡಾಕ ಕಿತಯಾಕ ವಿಕ್ತಾ? ಹಾಂವ ಐಡಿಯಾ ದಿತ್ತಾ. ತಾಂತುಚಿ ರಿಯಲ್ ಎಸ್ಟೇಟ್ ಬಿಜಿನೆಸ್ ಸೂರ ಕರಿ. ಹಾಂವ ಎನ್.ಎ., ಕೆ.ಜಿ.ಪಿ. ಪೂರಾ ಕೊರೋನು ದಿತ್ತಾ. ತ್ಯಾಂಚಿ ಜಮೀನ ಡೆವಲೆಪ್‌ಮೆಂಟ್ ಕೊರನು, ಪ್ಲಾಟ್ ಕೋರ್ನು ವಿಕ. ದುಡ್ವಾ ವಯ್ರಿ ದುಡ್ಡು ಕಮೋವೇತ. ತಾಂತು ಆಪಣಾಕ ಥೊಡೊ ವಾಂಟೊ ದೀ ಪುರೊ ಮ್ಹಳ್ಳೊ.