ಹಾತ್ತಾಂತುಲೆ ಲಾಠಿ ಘೂಂವ್ಡೆತಾ ಪೋಲಿಸ್ ಇನ್ಸ್ಫೆಕ್ಟರ್ ದಿನೇಶು ತೀನ್ಚಾರ ಪಂತಾ ತ್ಯಾ ಕಾರಾ ಸುತ್ಲೂ ಪ್ರದಕ್ಷಿಣ ಕಾಡ್ತಾ. ಖಂಚೇಯಿ ಅನ್ಮಾನು ಪಾವ್ಚೆ ತಸ್ಸಾಲೆ ಸಾಮಾನ ಜಾಂವೊ ಹತ್ವಾರ ತಾಕ್ಕಾ ದೆಕ್ಕುಪಣಾ. ತಶ್ಶಿ ಜಾಲ್ಯಾರಿ ಕಾರಾ ಭಿತ್ತರಿ ಹೇ ಜೋಡಿ ಮರಣ ಕಶ್ಶಿ ಘಡಲೆ? ಕೋಣ್ತರಿ ವಿಷ ದೀವ್ನು ಮಾರನು ಕಾಡಿಲೆ ಆಸಲೇರಿ ಮ್ಹಡೆಚೆ ಬಣ್ಣ ಚಿಕ್ಕ ಪೂಣಿ ಬದಲ್ತಾಶ್ಶಿಲೆ. ನಾ ಪೆಸ್ಕತಿ, ಪಿಸ್ತೂಲಾನ ಮಾರಿಲೆ ಆಸಲೇರಿ ತಾಜ್ಜ ಲಕ್ಷಣ, ಸಾಕ್ಷಿ ಪೂಣಿ ದಿಸ್ತಾಶ್ಶಿಲೆ. ಥೊಡೆ ಪೂಣಿ ರಗತ ಬಾಯರ ಎತ್ತಾಶ್ಶಿಲೆ. ಖಂಚೇ ಲಕ್ಷಣ ನಾ, ಖಂಚೇ ಆಯುಧ ನಾ... ಮ್ಹಳ ಮಾಗಿರಿ ಖೂನಿ ಜಾವಚಾಕ ಸಾಧ್ಯ ನಾ... ಎಕ್ಸಿಡೆಂಟ್ ಸಹಿತ ನ್ಹಂಯಿ. ಕಾರ ರಾಬ್ಬಿಲೆ ಜಾಗೇಚಾನ ಏಕ ಫೀಟ್ ಸಹಿತ ಮುಖಾರಿ- ಮಾಕಸಿ ವಚ್ಚನಿ. ತಶ್ಶಿ ಜಾಲಯಾರಿ ಸಹಜ ಮರಣ ಜಾವ್ನಾಸ್ಸುಕ ಪುರ್ವೆ? ಇತ್ತುಲೆ ಲ್ಹಾನ ವಯಾಂತು ಸಹಜ ಮರಣ ಯವಚಾಕ ಫಾವ ಆಸ್ಸವೇ? ದೊಗ್ಗಾಲೆ ವಯ ೪೦ ಭಿತ್ತರಶಿ ದಿಸ್ತಾ. ಹಾರ್ಟ್ ಎಟ್ಯಾಕ್ ಜಾವ್ನಾಸ್ಸುನು ಪುರೊ ಮ್ಹೊಣು ಸಮಜೂವ್ಯಾ ಮ್ಹಳಯಾರಿ ದೊಗ್ಗಾಂಕ ಏಕ್ಕಾ ವೇಳ್ಯಾರಿ ಹಾರ್ಟ್ ಫೆಯಿಲ್ ಜಾವಚೆ ಫಾವ ಆಸ್ಸವೇ? ನ್ಹಂಯಿಸಿ ದೂಖಿ ಖಾಲೀಲೆ ಏಕ ಚೂರು ಲಕ್ಷಣ ಸಹಿತ ತಾಂಗೆಲೆ ತೊಂಡಾ ವಯರಿ ದಿಸ್ತಾ ನಾ... ದಿನೇಶಾಕ ಪೂರಾ ಅಯೋಮಯಶಿ ದಿಸ್ತಾ. ತಾಗೆಲೊಟ್ಟು ಆಯ್ಯಿಲೆ ಪಿ.ಸಿ.ಂಕ ಅಂತೂ ಕೌತುಕಾನಿ ಲಾಗ್ಗಿ ಎವಚೆ ಲೋಕಾಂಕ ದೂರ ಬೆರ್ಸುಚೆ ಕಾಮ ಜಾವ್ನು ವತ್ತಾ.
ತಿತ್ಲ ಭಿತ್ತರಿ ಪೋಟೊಗ್ರಾಫರ ಆನಿ ಪೊರೆನ್ಸಿಕ್ಸ್ ತಜ್ಞ ಆಯ್ಯಿಲೆ ಪೊಳೋನು ದಿನೇಶು ತಾಂಗೆಲೆ ಬಗಲೇನ ವತ್ತಾ. ಆನಿ ತಾಂಕಾ ದಿವಕಾ ಜಾಲೀಲೆ ಸೂಚನಾ, ಮಾರ್ಗದರ್ಶನ ಪೂರಾ ದಿತ್ತಾ. ತಿತ್ಲ ಭಿತ್ತರಿ ಬಂದೋಬಸ್ತಾಕ ಮ್ಹೊಣು ಆಪಯಿಲೆ ಆನಿ ಚಾರ ಲೋಕ ಕಾನ್ಸ್ಟೇಬಲ್ ಥೈಕ ಎತ್ತಾತಿ. ತಾಂಕಾಯಿ ಜಾಯ ಜಾಲೀಲೆ ಇನ್ಸ್ಟ್ರೆಕ್ಟನ್ ದಿಲೀಲೊ ದಿನೇಶು ಕಾರ ಪಾರ್ಕ ಜಾಲೀಲೆ ಬಾರಾಚೆ ಬಗಲೇನ ಘೂವ್ನು ಮ್ಹಾನೇಜರ್.. ಮ್ಹಾನೇಜರ್... ಮ್ಹಣ್ತಾ. (ಸಶೇಷ)
Comments
Appreciate the author by telling what you feel about the post 💓
No comments yet.
Be the first to express what you feel 🥰.
Please Login or Create a free account to comment.