ಸುಖಾಚೆ ಪಾವಲಿ - 2

ಏಳೊ ಶ್ರೀಮಂತ ಮನುಷು ಆಶ್ಶಿಲೊ. ಶ್ರೀಮಂತ ಮ್ಹಳಯಾರಿ ಅಗರ್ಭ ಶ್ರೀಮಂತು ಮ್ಹಣ್ತಾಮೂ! ತಸ್ಸಲೊ. ತೊಂ ಕೋಟ್ಯಾಧೀಶು ಸಮಾಜಾಂತು ವ್ಹಡ ಮನುಷು. ಕಾರಾರಿ ಭೊಂವ್ತಾಶ್ಶಿಲೊ. ಆಪಣಾಕ ನಾಂವ, ಕೀರ್ತಿ ಮೆಳ್ತಾ ಮ್ಹೊಣು ಜಾಲ್ಯಾರಿ ಮಾತ್ರ ದಾನ ದಿತ್ತಾಶ್ಶಿಲೊ. ಮನಭ$ರಿ ದುಡ್ವಾ ಗಮಂಢಿ ಭೊರನು ಘೆವನು ಆಶ್ಶಿಲೊ. ತಶ್ಶಿ ಮ್ಹೊಣು ಸಮಾಜಾಚಿ ಗರೀಬ, ಪೊಟ್ಟಾ ನಾತ್ತಿಲೆ ಆಯಲ್ಯಾರಿ ಏಕ ರೂಪಯಿ ಹಾತು ಉಬೋರ್ನು ದೀನಾಶ್ಶಿಲೊ. ಹಾಗೇಲಿ ಚರಡುವ ಸಹಿತ ತಶ್ಶಿಚಿ; ವ್ಹಡ ವ್ಹಡ ವ್ಯಾರು, ಉದ್ಯಮ ಸೂರು ಕೊರನು ವ್ಹಡ ಜನ ಮ್ಹೊಣೊನು ಘೆತ್ಲೆ ವಿನಃ ತಾನ್ನೀಯಿ ಸಮಾಜಾಚೆ ಸಕ್ಕಲ ಸ್ಥರಾಚೆ ಸಾಮಾನ್ಯ ಲೋಕಾಂಕ ಖಾಂಯಿ ಮದತ್ ಕರನಾ ಆಶ್ಶಿಲೆ. ಸಾಹಿತ್ಯ, ಕಲಾ ಪೂರಾ ವ್ಯರ್ಥ ಮ್ಹೊಣು ಕೋಣ್ಪುಣಿ ಹೇ ಖಾತ್ತಿರಿ ತಾಂಗೆಲಾಗ್ಗಿ ಘೆಲ್ಲ ಸತ್ತಾ ತಾಂಕಾ ಹಂಗ್ಸುನು ಪರತ ದಾಡತಾ ಆಶ್ಶಿಲೆ. ಮನುಷ್ಯು ಅಲ್ಪ ಆಯ್ಲಸತ್ತಾ ಅಶ್ಶಿ ಗರ್ವ ಪಾವ್ನು ಆಪಣಾ ಪಶಿ ವ್ಹಡೂ ನಾ ಮ್ಹಣಚ ವರಿ ನಾಂಚತಾ. ಹಾಕ್ಕಾ ದೇವಾನ ಏಕ್ಕ ಏಕ ಸಾನ ಡೋಸ್ ದಿಲ್ಲಿ. ಟ್ಯಾಕ್ಸ್ ಆಫೀಸಾಚೆ ಸ್ಕಾಡಾಚಾನ ಯವ್ನು ರೈಡ್ ಕೆಲ್ಲೊ. ಸಮ ಜಾವ್ನು ಟ್ಯಾಕ್ಸ್ ಭರನಿ, ಲೆಕ್ಕಪತ್ರ ಸಮರ್ಪಕ ನಾ ಮ್ಹೊಣು ಸಾತಾಠ ಕೋಟಿ ರೂಪಯಿ ದಂಡ ಘಾಲ್ಲೆ.

ನೆಲಾ ಪಶಿ ವ್ಹಡ ಸಮುದ್ರ. ತ್ಯಾ ಮಹಾ ಸಾಗರಾಂತು ಆಸ್ಸುಚೆ ಜೀವ-ಜಂತು, ಸಂಪತ್ತಾಕ ಮ್ಹೊಲ ಬಾಂದಚಾಕ ಸಹಿತ ಸಾಧ್ಯ ನಾ. ಜಾಲ್ಯಾರಿಚಿ ಸಮುದ್ರ ಕೆದ್ನತರಿ ಗಮಂಢಿಪಣ ದಾಖಯಿಲೆ ತುಮ್ಮಿ ಪಳಯಲ್ಯಾವೇ? ಜಗಭ$ರಿ ತಾಂತುಲೆ ಮಾಸೋಳಿ ಧರಚಾಕ ಮ್ಹೊಣು ಲಾಕಬರ ಲೋಕ ವತ್ತಾತಿ. ವ್ಹಡ ವ್ಹಡ ಮಚ್ವೆಂತು, ಸ್ಟೀಮರಾಂತು ಲಾಕಭರಿ ಲೋಕ, ಸಾಮಾನ ಏಕ್ಕಡ ತಾಕೂನು ಆನ್ನೇಕ್ಕಡೆ ವ್ಹರತಾತಿ. ಜಾಲ್ಯಾರಿಚಿ ತ್ಯಾ ಸಾಗರ ಗಮಂಢಿಪಣ ಪಾವನಾಶಿ ಮ್ಹೋಗಾನ ಸರ್ವಾಕ ಅನ್ಕೂಲ ಕೊರನು ದಿತ್ತಾ. 

ಏಕ ಭಾಂಯ್ಕ ಜಾಂವೊ ಥಂಳೆಕ ಪಳೇಯಾ! ಉದ್ಕಾನಿ ತ್ಯಾ ಭರಲೆ ಮ್ಹಳ್ಳ ಸತ್ತಾ ಚ್ಹಡ ಉದ್ದಾಕ ಬಾಯರ ಸೋಡ್ನು ಸೊಡ್ತಾ. ಮಹಾ ಕ್ರೂರ ಜಂತು ಮ್ಹಣೊನು ಘೆವಚೆ ವಾಘಾಕ ಘೆಯಾ. ಪೋಟ ಭರಲೆ ಸತ್ತಾ ಕಷ್ಟ ಕೊರನು ಆಪಣಾನ ಧರಿಲೆ ಜಂತುಲೆ ವ್ಹರಲೀಲೆ ವಾಂಟೊ ಥಂಯಿಚಿ ಸೋಡ್ನು ವತ್ತಾ. ಮಸ್ತ ಕ್ರೂರ ಜಂತು ಪೋಟ ಬೂಕ್ಕಿಲ ತೆದ್ದನಾ ಮಾತ್ರ ವಿಂಗಡ ಜಂತು ವಯ್ರಿ ಆಕ್ರಮಣ ಕರ್ತಾ. ಜಾಲ್ಯಾರಿ ಮನುಷ್ಯು ತಶ್ಶಿ ಆಸ್ಸವೇ? ದುಸ್ರ್ಯಾ ಖಂಚೇ ಪ್ರಾಣಿ ಜಾಂವೊ ಜೀವಿಕ ನಾತ್ತಿಲೆ ಪರಿಹಾರ ಜಾಯನಾತ್ತಿಲೆ ಭೂಕಿ ತಾಗೇಲಿ. ತಾಗೆಲೆ ಆಶೇಚೆ ಪೊಂಡಾಕ ಪಾಗೋರು ಮ್ಹೊಣು ನಾ. ಇತ್ಲೆ ಭರಲೆ ಮ್ಹೊಣು ಜಾಲ್ಯಾರಿ ಆನಿ ಇತ್ಲೆ ಒಟ್ಟು ಕೊರಚೆ ಉಮೇದ!

ದುಡ್ಡು, ಆಸ್ತಿ, ಸಂಪತ್ತಿ ಒಟ್ಟು ಕೊರಚೆ ಚೂಕಿ ನ್ಹಂಯಿ ಆಸಚಾಕ ಪುರೊ. ಜಾಲಯಾರಿ ಆಮಕಾ ಕಮ್ಮಿ ಆಶಿಲ ತೆದ್ದನಾ ನಾಕ್ಕಾ, ಆಮ್ಕಾ ಪುರ್‍ಜಾಲ್ಲಿಲೆ ಉಪರಾಂತ ಪೂಣಿ ಸಮಾಜಾಕ, ಗರೀಬಾಂಕ ಥೊಡೆ ದಿವಚೆ ಹರ್‍ಯೇಕ್ಲ್ಯಾಲೆ ಕರ್ತವ್ಯ ಜಾವ್ನಾಸ್ಸ. ಆನಿ ತಶ್ಶಿ ದಿಲೀಲೆ ನಿಮಿತ್ತ ಖಂಡಿತ ಕೋಣಾಕ ಊಣೆಪಣ ಯಾನಾ. ಮುಖಾರಿ ಆಮ್ಮಿ ಅರ್ಹಾಂಕ ದಿಲೀಲೆ ದುಡ್ವ್ವಾಚೆ ವ್ಯಾಜ(ವಾಡಿ) ಸಮೇತ ಆಮಕಾ ಪರತೂನು ಎತ್ತಾ. ಪರತ ದುಡ್ಡೂಚಿ ಮೇಳ್ನಿ ಜಾಲ್ಯಾರಿಚಿ ಆರೋಗ್ಯ ಭಾಗ್ಯ, ಸುಖ, ಶಾಂತಿ, ಸರ್ವ ಕಾರ್ಯ ಸಸೂತ್ರಾನಿ ಜಾವಚೆ ಹ್ಯಾ ನಿಮಿತ್ತ ಸಹಿತ ಆಮ್ಮಿ ಕೆಲೀಲೆ ದಾನಾಕ ಪ್ರತಿಫಲ ಮೇಳ್ನೂ ಮೆಳ್ತಾ. ಕಿತಯಾಕ ಮ್ಹಳಯಾರಿ ದೇವಾಲೆ ಸೃಷ್ಠಿಚೆ ಉದ್ದೇಶು ಹೇಂಚಿ! ಹೇ ಜಗಾಂತು ಆಸ್ಸುಚೆ ಹರಯೇಕ ಜೀವಿಕ ಸುಖಾಂತು ವಾಂಚಕಾ, ಆಮ್ಮಿ ಯವ್ಚೆ ಏಕ್ಲಿಚಿ, ವಚ್ಚೆ ಸಹಿತಿ ಏಕ್ಲೀಚಿ. ತ್ಯಾ ಮಧ್ಯೆ ಹಾಂಗಾ ವಾಂಚತಾನಾ ಪರಸ್ಪರ ಮೇಳ್ನು ಸರ್ವಾನಿ ಉದರ್ಗತಿ ಪಾವ್ಕಾ. ರೂಕು, ನ್ಹಂಯಿ, ಸಮುದ್ರ, ಗಾಯಿ, ಬೈಲ, ಸೂಣೆ, ಮಾಜ್ರಾಕ ಹೇ ತತ್ತ್ವ ಗೊತ್ತಾಸ್ಸ. ಬುದ್ದೊಂತು ಮ್ಹಣೊನು ಘೆವ್ಚೆ ಮನುಷ್ಯಾಕ ಗೊತ್ನಾ. ತೊಂ ಹೇ ಕಿತ್ತುಲೆ ವಗ್ಗಿ ಕಳ್ತಕಿ ತಿತ್ಲೆ ವಗ್ಗಿ ದುಃಖ, ಕಷ್ಟಾನಿ ಪಾರ ಜಾತ್ತಾ. 

ಸರ್ವಾಂಕ ದೇವು ಬರೆ ಕೊರೊಂ. -ಆರ್‍ಗೋಡು ಸುರೇಶ ಶೆಣೈ