“ಜಾಲಯಾರಿ ಡಾಕ್ಟರ ಮಾಮ್.. ತ್ಯಾ ಕಾರ್ಬನ್ ಮೊನಾಕ್ಸೈಡ್ ಕಾರಾ ಭಿತ್ತರಿ ಭೊರಚಾಕ ಕಾರಣ ಕಸ್ಲೆ? ಮ್ಹಣಚೆ ತುಮ್ಕಾ ಗೊತ್ನಾ, ಜಾಲ್ಯಾರಿ ಹಾಂಗಾಶ್ಶಿಲೆ ಏಕಳ್ಯಾಕ ತ್ಯಾ ಗೊತ್ತಾಸ್ಸ... ಅಶ್ಶಿ ಸಾಂಗೂನು ತಂಯಿ ಬಶ್ಶಿಲೆ ಸರ್ವಾಂಕ ಏಕ್ಪಂತಾ ಪಳೈತಾ. ಸಕಡಾಲೆ ತೋಂಡಾ ವಯರಿ “ತ್ಯಾ ಕೋಣ ಮ್ಹೊಣು ಕೋಳ್ಕಾ ಮ್ಹಣಚೆ ಕುತೂಹಲ ಆಸ್ಸುಚೆ ದೆಕ್ಕುಪಡ್ತಾಶ್ಶಿಲೆ. ಏಕಳಿ ಆಪಣಾಲೆ ಲಾಗ್ಗಿ ಬಶ್ಸಿಲೆ ಆನ್ನೇಕ್ಳ್ಯಾಕ ಸಂಶಯಾನಿ ಪಳೈತಾಶ್ಶಿಲೆ. “ಹೋ ಆಸಚಾಕ ಪೂರ್ವೆ? ಮ್ಹೊಣು! ಥಂಯಿ ಸೂ ಸಕ್ಕಲ ಪಡಲ್ಯಾರಿ ಸಹಿತ ಅವಾಜು ಆಯ್ಕುಪೊಡ್ಚೆ ತಸ್ಸಲೆ ನಿಃಶಬ್ಧ ಆಶ್ಶಿಲೆ.
ತ್ಯಾ ನಿಃಶಬ್ಧ ಚೀರ್ನು ಇನ್ಸಫೆಕ್ಟರ್ ದೀನೇಶಾಲೆ ಉತ್ತರ ಆಯ್ಕು ಪಡ್ತಾ. “ಮಿ. ಕೈಲಾಸ್ ತ್ಯಾ ಕಾರ್ಬನ್ ಮೊನಾಕ್ಸೈಡ್ ಕಶ್ಶಿ ಕಾರಾ ಭಿತ್ತರಿ ಬರಲೆ? ಮ್ಹಣಚೆ ತುಮ್ಕಾ ಗೊತ್ತಾಸ್ಸ. ಕಶ್ಶಿ ಮ್ಹೊಣು ಹಾಂಗಾ ಬಶ್ಶಿಲ್ಯಾಂಕ ಪೂರಾ ಸಾಂಗ್ತಾತಿವೇ? ಇತ್ಲೆ ಮ್ಹೊಣು ಆಪ್ಣಾಲೆ ಸುತ್ತೂ ರಾಬ್ಬಿಲೆ ಪಿ.ಸಿ.ಂಕ ಸನ್ನೆ ಕರತಾ. ಕೈಲಾಸಾಲೆ ದೊನ್ನೀ ಬಗಲೇನ ಏಕ್ಕೇಕ್ಲೆ ಪಿ.ಸಿ. ವಚ್ಚುನು ರಾಬತಾತಿ. ತಾಣೆ ಉಟೋನು ದಾವ್ನು ವಚ್ಚನಾಶಿ ಪಳೋಚಾಕ.
ಅಚಾನಕ್ ಜಾವ್ನು ಹೇ ಘಟನೇನ ಕೈಲಾಸು ಕಡಕಡ್ನು ವತ್ತಾ. ಜಾಲ್ಯಾರಿಚಿ ಉಟಾನು ರಾಬ್ಬುನು “ಮಿ. ಇನ್ಸ್ಫೆಕ್ಟರ್ ತುಮ್ಮಿ ಕಸ್ಸಲೆ ಜೋಕ್ ಕರ್ತಾ ಆಸ್ಸತಿವೇ? ಜಾಂವೊ ಹಾಂವ ಪದೇ ಪದೇ ಯವ್ನು ತುಮ್ಕಾ ಬಿಷ್ಟೇತಾ ಆಶ್ಶಿಲೊ ಮ್ಹಣ್ಚೆ ರಾಗಾನಿ ಹೇ ಕೇಸಾಂತು ಮಾಕ್ಕಾ ಶಿರ್ಕೊನು ಘಾಲ್ಕಾ ಮ್ಹೊಣು ಆಸ್ಸತಿವೇ? ಧೈರ್ಯಾನಿ ಉಲೋಕಾ ಮ್ಹೊಣು ಕೆಲಯಾರಿಚಿ ಸ್ವರಾಂತು ಮಸ್ತ ಆತಂಕ ಆಸ್ತಾ. ತಿತ್ಲ ಭಿತ್ತರಿ ಪಿ.ಸಿ. ಕಸ್ಟಡಿಂತು ಘಾಲೀಲೆ ಏಕಳೊ ಮನುಷ್ಯಾಕ ಆಪೋನು ಹಾಡ್ನು ಇನ್ಸ್ಫೆಕ್ಟರಲಾಗ್ಗಿ ರಾಬೈತಾ. ತಾಕ್ಕ ಪಳೈಚ ಭಿತ್ತರಿ ಆನ್ನಿಕೆ ಆತಂಕಾಕ ಪಡಿಲೊ ಕೈಲಾಸ “ಮಾನಸ್ ಕುಮಾರ್... ತೂಂ ಹಾಂಗಾ? ಮ್ಹಣ್ತಾ; ಆನಿ ಜೀಬ ಚಾಬ್ಬುನು ಘೆತ್ತಾ. ತೆದ್ನಾ ಇನ್ಸ್ಫೆಕ್ಟರು ಪಳೆ ತಾಕ್ಕಾ ತೂಂವೆ ಕಶ್ಶಿ ಕರೆಕ್ಟ್ ಜಾವ್ನು ಗುರ್ತು ಕೆಲ್ಲೆ. ರುದ್ರಯ್ಯ ಆನಿ ವರುಣಾಕ ಮರ್ಡರ್ ಕೊರಚಾಕ ತುಕ್ಕಾ ಹೇ ಕಾರ್ಬನ್ ಮೊನಾಕ್ಸೈಡಾಚೆ ಐಡಿಯಾ ದಿಲೀಲೊ ಮಾಸ್ಟರ್ ಮೈಂಡ್ ಹೋಂಚಿ ನ್ಹಂಯಿವೇ? ಹೇ ಮ್ಹಡಿಯಾಕ ತೂಂವೆ ತೀನ ಲಾಕ್ ರೂಪಯಿ ಸಹಿತ ದೀವ್ನು ಜಾಲ್ಲಾಮೂ! ಮ್ಹಣ್ತಾ ಸೀಟಾಚಾನ ಉಟೋನು ಕೈಲಾಸಾಲಾಗ್ಗಿ ಎತ್ತಾ. ತಿತ್ಲ ಭಿತ್ತರಿ ಕೈಲಾಸು ಮಾತ್ತೆ ಸಕ್ಕಲ ಘಾಲ್ನು ರಾಬ್ಬೂನು ಆಸ್ತಾ. ತಾಗೆಲೆ ಲಾಗ್ಗಿ ಆಯ್ಯಿಲೊ ಇನ್ಸ್ಫೆಕ್ಟರ “ಆತ್ತ ಪೂಣಿ ತೂಂಚಿ ರುದ್ರಯ್ಯಾಲೆ ಆನಿ ವರುಣಾಲೆ ಖೂನಿ ಕೆಲೇಲೆ ಮ್ಹೊಣು ಒಪ್ಪುನು ಘೆತ್ತವೇ? ಮ್ಹೊಣು ತಾಗೆಲೆ ಮುಸೂಡು ವಯರಿ ಉಬ್ಬರ್ಚಾಕ ಪಳೈತಾ. ಪರತ ಕೈಲಾಸು ಮಾತ್ತೆ ಸಕ್ಕಲ ಕೊರನು ರಾಬ್ತಾ.
Comments
Appreciate the author by telling what you feel about the post 💓
No comments yet.
Be the first to express what you feel 🥰.
Please Login or Create a free account to comment.