ಸುಖಾಚೆ ಪಾವಲಿ - 6

ಆಜಿ ಚರ್ಡು ಆಶಿಲೊ, ಫಾಯಿ ಚರಕೊ(ಚಾಲ್ಲೊ) ಜಾತ್ತಾ, ಮಾಗಿರಿ ಯುವಕ ಜಾತ್ತಾ, ಉಪರಾಂತ ಪ್ರಾಯಾಚೊ ಜಾವ್ನು, ಮಾಂತಾರೊ ಜಾತ್ತಾ. ಹೇ ಸಕ್ಕಡ ಬದಲಾವಣ ಪ್ರಕೃತಿ ಸಹಜ ಜಾವ್ನ ಘಡಚೆ ತಸ್ಸಲೆ. ಹೇ ಆಮ್ಕಾ ಭಾಯರಿ ತಾಕೂನು ದೆಕ್ಕೂ ಪೊಡಚೆ ತಸ್ಸಲೆ ವಿಷಯು. ತಾಂತು ಕಾಳೊ, ಘೋರೊ, ದೀಗ ನಾಂಕಾಚೊ, ಚಟ್ಟೆ ನಾಂಕಾಚೊ, ರೂಂದ ನಿಡಲಾಚೊ ಮ್ಹೊಣು ಸಬಾರ ಬದಲಾವಣ ದಿಸಲ್ಯಾರಿಚಿ ಸಾಮಾನ್ಯ ಜಾವ್ನು ಪ್ರತಿಯೇಕ ಜೀವಿಕ ಅಸ್ಸಲೆ ವಾಡಪಣ ಆಸ್ಸೂನು ಆಸ್ತಾ. ದೈಹಿಕ ವಾಡಪಣ ಪ್ರಕೃತಿದತ್ತ. ಜಾಲಯಾರಿ ಆಪಣಾನ ಸ್ವಯಂ ಕೊರನು ಘೆವಚೆ ವಾಡಪಣ ಏಕ ಆಸ್ಸ. ತ್ಯಾಂಚಿ ಮಾನಸಿಕ ವಾಡಪಣ. ತಾಕ್ಕಾ ಆತ್ಮಾಭಿವೃದ್ಧಿ ಮ್ಹೊಣೂ ಸಾಂಗತಾತಿ. 

ಮನುಷ್ಯು ಮ್ಹಳಯಾರಿ ಖಾಲಿ ಹೇ ಶರೀರಾ ನ್ಹಂಯಿ. ದೂದ, ಸಾಕ್ಕರ, ಪಿಟ್ಟಿ ಮೇಳ್ನು ರುಚಿ ಜಾಲೀಲೆ ಚಾಹ ತಯಾರ ಜಾವಚೆ ವರಿ ಶರೀರ ಆನಿ ಚೈತನ್ಯ ಮೇಳ್ನು ಮನುಷ್ಯು ಜಾಲ್ಲಾ. ಸಾನ ಚರಡುವಾನಿ ಲೂಟಿ ಕೆಲಯಾರಿ, ಮಾಂಕ್ಡಛಾಪ, ಪಟಿಂಗಪಣ ದಾಖಯಲ್ಯಾರಿ ತ್ಯಾ ವಯೋ ಸಹಜ ಮ್ಹೊಣು ಗಪ್ ಉರತಾತಿ. ತ್ಯಾಂಚಿ ಏಕಳೊ ವಯಸ್ಕಾನಿ ಖಂಯಿತರಿ ಕಾಂಪಲ್ಯಾರಿ, ಲೂಟಿ ಕೆಲಯಾರಿ ಕೂಡ್ಲೆ ಪೋಲೀಸಂಚಿ ಎವ್ನು ತಾಂಡೂನು ವ್ಹರನು ಜೇಲಾ ಭಿತೇರಿ ಧೂಂಗುಳ್ತಾತಿ. ಮ್ಹಳಯಾರಿ ವಯೋ ಸಹಜ ಜಾವ್ನು ಮನುಷ್ಯಾನಿ ವಾಡಚೆ ಪ್ರಕೃತಿ ನಿಯಮು ಜಾಲ್ಲೆ. ಹೇ ಹರ್‍ಯೇಕ ಮನುಷ್ಯಾನಿ ಅರ್ಥು ಕೊರನು ಘೆವ್ಕಾ. 

ಆಜಿ ಮನುಷ್ಯಾಲೆ ಅಂತರ್ಯಾಚೆ ಪ್ರಗತಿ ನಾಸ್ತಿ ಮ್ಹಣಚೆ ತಿತ್ಲೆ ಊಣೆ ಜಾಲ್ಲಾ. ಆಮ್ಗೆಲೆ ದೇಶಾಂತು ಕಸ್ಸ ಕಸ್ಸಲೆ ಸಾಧು ಸಂತ, ಋಷಿ ಮುನಿ ಜಾವ್ನು ಘೆಲ್ಲಿಂತಿ ಯವಜಿಯಾ. ತಾನ್ನಿ ರಾನ್ನಾಂತು ರಾಬ್ಬೂನು, ಪಾಳ-ಮೂಳ ಖಾವ್ನು ಅಮೂಲ್ಯ ಜ್ಞಾನ-ವಿಜ್ಞಾನ ಆಮ್ಕಾ ದಿವನು ಘೆಲ್ಲಿಂತಿ. ಜಾಲಯಾರಿ ಆಜಿ ಅಸ್ಸಲೆ ಸಂತತಿ ಆಮ್ಗೆಲೆ ದೇಶಾಂತು ಸೃಷ್ಠಿ ಜಾತ್ತಾ ನಾ. ಹಾಕ್ಕ ಕಾರಣ ಆಮ್ಮಿ ಆತ್ಮಾಭಿವೃದ್ಧಿ ಖಾತೇರಿ ಸಸಾರ ಕರತಾ ಆಸ್ಸುಚೆ! ದುಡ್ಡು, ಸಂಪತ್ತಿ, ಸುಖ-ಭೋಗ ನಿಮಿತ್ತಿ ಸಂತೋಷು ಮೇಳ್ನಾ ಮ್ಹೊಣು ಕೋಳ್ನು ತ್ಯಾ ಸೋಡ್ನು ಆಯ್ಯಿಲೆ ಮಸ್ತ ಲೋಕ ಮಹನೀಯ ಆಸ್ಸತಿ. ತಾಂಗೆಲೆ ಜೀವನ ಆಮ್ಕಾ ಆದರ್ಶ ಜಾವ್ಕಾ ಆಶ್ಶಿಲೆ. ಆಜಿ ಸಕ್ಕಡ ಉಲ್ಟಾ ಜಾಲ್ಲಾ. ಮನುಷ್ಯು ಬಾಹ್ಯ ಸೌಂದರ್ಯ, ಪ್ರತಿಷ್ಠೆಕ ಭೂಲ್ಚೆ ಚ್ಹಡ ಜಾವನು ಆತ್ಮಾಭಿವೃದ್ಧಿ ಮೂಲ್ಲೆಕ ಪಡಲಾ. ಗೋಡಮೂತ ಆಯ್ಯಿಲ್ಯಾನಿ ಸಾಕ್ಕರ ಘಾಲನಾಶಿ ಚಾಹ ಕೊರನು ಪಿಲ್ಲಿ ವರಿ ಜಾಲ್ಲಾ ಆಮ್ಗೆಲೆ ಪರಿಸ್ಥಿತಿ. 

ಜೀವನ ಏಕ ಸಾಧನ ಕೊರಚೆ ಶಾಳಾ ಜಾವ್ನಾಸ್ಸ. ಆಮ್ಮಿ ಎತ್ತನಾ ಕಸ್ಸಲೇ ಹಾಣಾಶಿ ಆಸ್ಸುಕ ಪುರೊಂತಿ, ವತ್ತಾನಾ ಸಹಿತ ಕಸಲೇ ವ್ಹರನಾಶಿ ಆಸ್ಸುಕ ಪುರೊಂತಿ. ಜಾಲಯಾರಿಚಿ ಆಮಿ ಆಮ್ಮಿ ಕೆಲೀಲೆ ಪ್ರಾರಬ್ಧ ಕರ್ಮಾಚೆ ಫಲ ಆಮಗೇಲೆ ಪಾಟಿ ಧೋರನು ಎತ್ತಾ ಮ್ಹಣಚೆ ಸತ್ಯ. ಪ್ರಾರಬ್ಧ ಕರ್ಮಾಚೆ ವಜನ ಊಣೆ ಕೆಲೀಲ ತಶ್ಶೀಚಿ ಮನುಷ್ಯು ಆತ್ಮಾಭಿವೃದ್ಧಿ ಪಾವಚಾಕ ಚ್ಹಡ ಚ್ಹಡ ತ್ರಾಣ ಆಸ್ಸ ಕೊರನು ಘೆತ್ತಾ. ತೆದ್ದನಾ ತಾಗೇಲೆ ಮನ ದೇವಾಲೆ ಬಗಲೇನ ತಾಜ್ಜೀತ್ಲೆಕ ತಾಂಡತಾ. ಹೇ ವಿಷಯು ಆಮ್ಮಿ ಪಯಲೆಕ ಸಮಜೂನು ಘೆವಕಾ. 

ದೇವಾಲೆ ಕಡೇನ ಮನಾಕ ಘೂಂವ್ಡೆಲಿ ತಾಕೂನು ಆಮಗೇಲೆ ಮನ ಆನಿ ಚಿತ್ತ ಶಾಂತ ಜಾತ್ತಾ. ಸ್ಥಿರ ಜಾತ್ತಾ. ಚಂಚಲತಾ ದೂರ ಜಾತ್ತಾ. ದುಃಖ ಹಾಡಚೆ ಕರ್ಮ ಕೊರಚೆ ತಾಕೂನು ಆಮ್ಮಿ ಭಾಯರಿ ಎತ್ತಾತಿ. ಸರ್ವಶಕ್ತ, ಸರ್ವಾಲೆ ಪಾಲಕು ಪರಮಾತ್ಮಾಲೆ ದೃಷ್ಟಿ ಆಮಚೇರಿ ಪಡತಾ. ಮುಖಾರಿ ದುಃಖ, ಕ್ಲೇಶ ಗಿಳಚೆ ತ್ರಾಣ ತೊಂ ಆಮಕಾ ದಿತ್ತಾ. ದೇವಾಲೆ ಜಪು, ಧ್ಯಾನ, ಪ್ರಾಣಾಯಾಮ ನಿಯಮಿತ ಜಾವ್ನು ಅಭ್ಯಾಸು ಕೊರಚೆ ತಾಕೂನು ಆಮಕಾ ಮನ ಸ್ಥಿರ ಕೊರಚಾಕ ಸಾಧ್ಯ ಜಾತ್ತಾ. ಚಂಚಳತಾ ದೂರ ಜಾವ್ನು ಸ್ಥಿರ ಜಾಲೀಲೆ ಮನಾಂತು ವಿವೇಕ ಆಪ್ಣೀತ್ಲ್ಯಾಕ ಉದ್ದೆತಾ. ತೆದ್ದನಾ ಜೀವನ ಸುಖಕರ ಜಾತ್ತಾ. ಪರಮಾತ್ಮಾಲೆ ಕೃಪೆನ ಸುಖಾಚೆ ಜೀವನ ಸಕಡಾಂಕ ಪ್ರಾಪ್ತ ಜಾಂವೊ.