ದೈನಿಕ ಧಾರವಾಹಿ ವಾಂಟೊ - 7

ಏಕ ಆಠ್ವಡೆ ಜಾವ್ನು ಆಸ್ಸುಚಾಕ ಪುರೊ ಏಕ್ದೀಸು ರುದ್ರಯ್ಯ ಆನಿ ವರುಣಾಲೆ ಪೋಸ್ಟ್‌ಮಾರ್ಟ್ಂ ಕೆಲೀಲೊ ಡಾಕ್ಟರ್ ಪ್ರಸಾದ ದಿನೇಶಾಕ ಪೋನ್ ಕೊರನು “ತುಮ್ಮಿ ಚಿಕ್ಕೆ ಎತ್ತತಿವೇ? ರುದ್ರಯ್ಯ ಆನಿ ವರುಣಾಲೆ ಮರಣಾಚೆ ರಹಸ್ಯ ಸೊದ್ಲಾ ಹಾಂವೆ ಮ್ಹಣ್ತಾ. 

ತೆದ್ದನಾ ಇನ್ಸಫೆಕ್ಟರು ಮ್ಹಣ್ತಾ “ಏಕ ಕಾಮ ಕರಾ; ಫಾಯಿ ಸಕ್ಕಾಣಿ ನವ್ವ ಗಂಟ್ಯಾಕ ತುಮ್ಮಿ ಹಾಂಗಾಕ ಮ್ಹಳಯಾರಿ ಆಮ್ಗೆಲೆ ಸ್ಟೇಷನ್ನಾಕ ಯೆಯ್ಯಾತಿ. ಹಾಂವ ರುದ್ರಯ್ಯಾಲೆ ಆನಿ ವರುಣಾಲೆ ಸಂಬಂಧಿಕಾಂಕ, ಪ್ರೆಸ್‌ರಿಪೋರ್ಟರಾಂಕ ಪೂರಾ ಆಪೈತಾ. ಮ್ಹಣ್ತಾ.

“ಜಾಯ್ತ.. ಮ್ಹೊಣು ಡಾಕ್ಟರು ಪೋನ್ ಡಿಸ್‌ಕನೆಕ್ಟ್ ಕರ್ತಾ. ಹೆರ್‍ದೀಸು ಇನ್ಸ್‌ಫೆಕ್ಟರು ಸಾಂಗಿಲ್ವರಿ ಸಕಡಾಂಕ ಆಪೋನು ಆಸ್ತಾ. ರುದ್ರಯ್ಯ, ವರುಣಾ ಘರ್‍ಚಾಲೆ ಬರಶಿ ಪದೇ ಪದೇ ಯವ್ನು ಎನ್‌ಕ್ವಾಯರಿ ಕೈ ಪರಂತ ಆಯ್ಲೆ ಮ್ಹೊಣು ಅವಾಜ ಘಾಲಾಶ್ಶಿಲೊ ರಮಣಿಲಿ ಬಾಪ್ಪುಲಿ ಕೈಲಾಸಾಕ ಸಹಿತ ತೊಂ ಯೋ ಮ್ಹೊಣು ಆಸ್ತಾ. ನವ್ವ ಗಂಟ್ಯಾಕ ಥೈಕ ಆಯ್ಯಿಲೊ ಡಾಕ್ಟರ ಪ್ರಸಾದಾಕ ಸ್ವಾಗತ ಕೆಲೀಲೊ ದಿನೇಶು ಸಕಡಾಲೆ ಒಳಕ ತಾಕ್ಕ ಕೊರನು ದಿತ್ತಾ.  

ಪೂರಾ ಜನ ಬಸ್ಲೆ ಮಾಗಿರಿ ಉಟೋನು ರಾಬಿಲೊ ಡಾಕ್ಟರ್ ಪ್ರಸಾದ “ಕಾರಾ ಭಿತ್ತರಿ ಆಶ್ಶಿಲ್ಯಾಲೆ ಮರಣ ಆಕಸ್ಮಿಕ ಜಾವ್ನು ಘಡಲಾ. ತಾನ್ನಿ ಬರಪೂರ ಸೋರೊ ಪೀವ್ನು ಆಶ್ಶಿಲೆ. ಕಾರಾಚೆ ಡೋರ್, ವಿಂಡೊ ಸಕ್ಕಡ ಬಂದ್ ಕೊರನು ಘೇವ್ನು ಆಶ್ಶಿಲೆ. ತೆದ್ದನಾ ಕಾರಾಚೆ ಎಸಿ ತಾಕೂನು ಆಕಸ್ಮಿಕ ಜಾವ್ನು ಕಾರ್ಬನ್ ಮೊನಾಕ್ಸೈಡ್ ಉತ್ಪತ್ತಿ ಜಾಲ್ಲಾ. ಕಾರ್ಬನ್ ಮೊನಾಕ್ಸೈಡ್ ಹೇ ಏಕ ಮಸ್ತ ಅಪಾಯಾಚೆ ಗ್ಯಾಸ. ಏಕ ಮನುಷ್ಯಾನ ಹೇ ಗ್ಯಾಸ ೭೦ ಪಿಪಿ‌ಎಂ ಪಶಿ ಚ್ಹಡ ಸೇವನ ಕೆಲಯಾರಿ ತಾಜ್ಜೆನ ಜೀವಹಾನಿ ಘಡಚೆ ಸಾಧ್ಯತಾ ಆಸ್ಸ. ಕಾರ್ಬನ್ ಮೊನಾಕ್ಸೈಡ್ ಮೆಂಟಲಾಕ ನಿಷ್ಕ್ರೀಯ ಕರ್ತಾ. ಹಾರ್ಟ್ ಸಹಿತ ತಾಜ್ಜೇನ ಆಘಾತ ಪಾವ್ತಾ ಆನಿ ಮರಣ ಘಡ್ತಾ. ಹೇ ಕೇಸಾಂತು ದೊಗ್ಗಚಿ ಟೈಟ್ ಜಾವ್ನು ಆಶ್ಶಿಲೆ. ಕಸಲ್ಕಿ ಘಡ್ತಾ ಆಸ್ಸ ಮ್ಹಣಚೆ ನಜರಾಕ ಯವ್ಚ ಭಿತ್ತರಿ ಕಾರ್ಬನ್ ಮೊನಾಕ್ಸೈಡ್ ತಾಕೂನು ದೊಗ್ಗಾಲೆ ಹಾರ್ಟ್ ಆನಿ ಮೆದುಳಾ ವಯ್ರಿ ವಾಯ್ಟ ಪರಿಣಾಮ ಆಸ್ಸ ಜಾಲೀಲೆ, ಬಾಯ್ಚಾನ ಶುದ್ದ ವಾರೆ ಯಾನಾತ್ತಿಲ ನಿಮಿತ್ತ ಕೂಡ್ಲೆ ತಾನ್ನಿ ಕೋಮಾಕ ವಚ್ಚುನು ಹಾರ್ಟ್ ಅಟ್ಯಾಕ್ ಜಾವ್ನು ಮರಣ ಪಾವ್ಲೆ. ಹಿಸ್ಟೋಪಥಾಲಜಿ ರೀಪೋರ್ಟ್ ಸಹಿತ ತಶ್ಶೀ ಆಯಲಾ. ಹಾಂವ ಹಾಂಗಾಶ್ಶಿಲೆ ಸರ್ವ ಪತ್ರಕಾರಾ ಲಾಗ್ಗಿ ಏಕ ಮಾಗಣಿ ಕರತಾ ಕಸ್ಸಲೆ ಮ್ಹಳಯಾರಿ ತುಮ್ಮಿ ಸಕ್ಕಡ ಲೋಕಾಂಕ ಏಕ ಜಾಗೃತಿ ದಿವಕಾ. ಕೋಣ ಜಾಂವೊ ಕಾರಾಂತು ಬಾಯರ ವಚ್ಚೆ ಪಯಲೆ ತೀನ್ಚಾರ ಮಿನಿಟ ಪೂಣಿ ತಾಜ್ಜೆ ಬಾಗಿಲ, ಗ್ಲಾಸ ಉಗಾಡ್ನು ದವೋರ್ನು ಚಾಂಗ ವಾರೆಂ ಭಿತ್ತರಿ ಯವ್ಚ ವರಿ ಕೊರಕಾ. ಕಾರ ಸ್ಟಾರ್‍ಟ ಜಾವ್ನು ಏಕ ಕಿಲೋಮೀಟರ್ ಚಮ್ಕಲ ಮಾಗಿರಿ ಎಸಿ ಚಾಲು ಕೊರಕಾ. ದಮ್ಮು ಇತ್ಯಾದಿ ಆಶ್ಶಿಲ್ಯಾಂಕ ಹಾಜ್ಜೆನ ಮಸ್ತ ತ್ರಾಸು ಜಾತ್ತಾ. ತುಮ್ಮಿ ಹೇ ವಿಷಯು ಸಕಡಾಂಕ ಕೊಳ್ಚೆವರಿ ಪ್ರಕಟ ಕೊರಕಾ. ಮ್ಹೊಣು ಸಾಂಗೂನು ಬಸತಾ.